ரேஷன் அரிசி கடத்தி வந்த வாகனத்தை ஜனநாயக வாலிபர் சங்கத்தினர் சிறைபிடிப்பு

அன்னதானப்பட்டி:-

சேலம் தாதகாப்பட்டி அம்பாள் ஏரி ரோடு பகுதியில் இருந்து சரக்கு வாகனத்தில் ரேஷன் அரிசி கடத்தப்படுவதாக நேற்று இந்திய ஜனநாயக வாலிபர் சங்கத்தினருக்கு தகவல் கிடைத்தது. அதன்பேரின் அவர்கள் அங்கு விரைந்து சென்று அந்த வாகனத்தை சிறைபிடித்து போராட்டத்தில் ஈடுபட்டனர். மேலும் அதில் ரேஷன் அரிசி கடத்தி வரப்பட்டது உறுதி செய்யப்பட்டது. இதற்கிடையில் அந்த சரக்கு வாகனத்தில் இருந்த 3 பேரில் 2 பேர் நைசாக தப்பி ஓடிவிட்டனர்.

மேலும் பிடிபட்ட நபரையும், ரேஷன் அரிசியையும் சேலம் குடிமைப்பொருள் வழங்கல் குற்றப்புலனாய்வுத்துறை போலீசில் இந்திய ஜனநாயக வாலிபர் சங்கத்தினர் ஒப்படைத்தனர். தொடர்ந்து போலீசார் நடத்திய விசாரணையில் பிடிபட்ட நபர் தஞ்சாவூர் மாவட்டம் பாபநாசம் அருகே உள்ள அருள்மொழிபேட்டை பகுதியை சேர்ந்த சிவகுமார் (வயது 30) என்பது தெரியவந்தது. இதையடுத்து அவரை போலீசார் கைது செய்தனர். இதையடுத்து சரக்கு வாகனம் மற்றும் அதில் 28 மூட்டைகளில் இருந்த 1 டன் ரேஷன் அரிசியை போலீசார் பறிமுதல் செய்தனர். மேலும் இதுதொடர்பாக சரக்கு வாகனத்தின் உரிமையாளர் உள்பட 2 பேரை போலீசார் தேடி வருகின்றனர்.