கலபுரகி அருகே மரத்தில் கார் மோதி ஒரே குடும்பத்தில் 5 பேர் பலி

பெங்களூரு:

கலபுரகி அருகே மரத்தில் கார் மோதிய கோர விபத்தில் ஒரே குடும்பத்தில் 5 பேர் உடல் நசுங்கி பலியானாா்கள். கோவிலுக்கு வந்து திரும்பியவர்களுக்கு இந்த பரிதாபம் நேர்ந்துள்ளது.

கலபுரகி மாவட்டம் அப்சல்புரா தாலுகா தேவலகானகாபுரா கிராமம் அருகே உள்ள தேசிய நெடுஞ்சாலையில் நேற்று மாலையில் ஒரு கார் சென்று கொண்டு இருந்தது. அப்போது திடீரென்று டிரைவரின் கட்டுப்பாட்டை இழந்த கார், சாலையோரம் நின்ற மரத்தில் மோதியது. மோதிய வேகத்தில் காரின் முன்பகுதி அப்பளம் போல் நொறுங்கியது. இந்த கோர விபத்தில் காரில் இருந்த டிரைவா் உள்பட 5 பேர் உடல் நசுங்கி சம்பவ இடத்திலேயே பலியானார்கள்.

மேலும் ஒரு குழந்தை உள்பட 3 பேர் படுகாயம் அடைந்து உயிருக்கு போராடினார்கள். தகவல் அறிந்ததும் அப்சல்புரா போலீசார் விரைந்து வந்து குழந்தை உள்பட 3 பேரையும் மீட்டு அரசு ஆஸ்பத்திரியில் அனுமதித்தனர். அங்கு 3 பேருக்கும் தீவிர சிகிச்சை அளிக்கப்பட்டு வருகிறது.

போலீஸ் விசாரணையில், விபத்தில் பலியானவர்கள் மராட்டிய மாநிலத்தை சேர்ந்த பாபா ஷாகேப்(வயது 54), அவரது மனைவி சாயா, மகள்கள் கோமலி, ராணி மற்றும் ஈராபாய் என்று தெரிந்தது. படுகாயம் அடைந்தவர்கள் சைத்ராலி, ஷாகிலி மற்றும் 3 வயது ஆண் குழந்தை என்று தெரிந்தது. 

பாபா ஷாகேப் தனது குடும்பத்தினருடன் மராட்டியத்தில் இருந்து கலபுரகியில் உள்ள தத்தாத்ரேயா கோவிலுக்கு வந்துவிட்டு மராட்டியத்திற்கு திரும்பிய போது விபத்தில் சிக்கியது தொியவந்தது.

பாபா ஷாகேப்பின் கவனக்குறைவு காரணமாக விபத்து நடந்திருக்கலாம் என்று போலீசார் கருதுகின்றனர். இதுகுறித்து அப்சல்புரா போலீசார் வழக்குப்பதிவு செய்து விசாரணை நடத்தி வருகின்றனர்.