நாமக்கல் மாவட்டத்தில் ஒரே நாளில் 3,430 பேருக்கு கொரோனா தடுப்பூசி

நாமக்கல்:

தமிழகத்தில் கொரோனாவின் தாக்கம் குறைந்து வந்தாலும், அனைவருக்கும் தடுப்பூசி செலுத்த அரசு பல்வேறு நடவடிக்கைகளை எடுத்து வருகிறது. அதன்படி நாமக்கல் மாவட்டத்தில் இதுவரை நடந்த 23 மாபெரும் தடுப்பூசி முகாம்களில் 7 லட்சத்து 37 ஆயிரம் பேர் தடுப்பூசி செலுத்தி கொண்டனர். இந்தநிலையில் நேற்று 24-ம் கட்டமாக மெகா தடுப்பூசி முகாம் மாவட்டத்தில் 422 மையங்களில் நடைபெற்றது. இந்த முகாம் பணிகளில் டாக்டர்கள், செவிலியர்கள் உள்பட சுமார் 5 ஆயிரம் பேர் ஈடுபடுத்தப்பட்டு இருந்தனர். காலை 9 மணி முதல் மாலை 5 மணி வரை நடைபெற்ற இந்த முகாமில் நேற்று ஒரே நாளில் 3 ஆயிரத்து 430 பேருக்கு கொரோனா தடுப்பூசி செலுத்தப்பட்டதாக அதிகாரிகள் தெரிவித்தனர்.