கல்வராயன்மலையில் 12 ஆயிரம் லிட்டர் சாராய ஊறல் அழிப்பு

கச்சிராயப்பாளையம் 

கச்சிராயப்பாளையம் அடுத்த கல்வராயன்மலையில் சாராயம் காய்ச்சுவதாக போலீசாருக்கு தகவல் கிடைத்தது. இதையடுத்து கள்ளக்குறிச்சி மாவட்ட போலீஸ் சூப்பிரண்டு செல்வகுமார் உத்தரவின்பேரில் கள்ளக்குறிச்சி மதுவிலக்கு இன்ஸ்பெக்டர் மூர்த்தி மற்றும் போலீசார் கல்வராயன்மலை வனப்பகுதியில் சாராய வேட்டையில் ஈடுபட்டனர்.

 அப்போது தடுத்தான்பாளையம் அருகே உள்ள சேல் ஊத்து ஓடையில் சாராயம் காய்ச்சுவதற்காக 24 மினி குடிநீர் தொட்டிகளில் 12,000 லிட்டர் சாராய ஊறல் பதுக்கி வைக்கப்பட்டிருந்தது கண்டுபிடிக்கப்பட்டது. இதையடுத்து அந்த சாராய ஊறலை கைப்பற்றிய போலீசார் அவற்றை கீழே கொட்டி அழித்தனர். மேலும் சாராயம் காய்ச்சிய மர்மநபர்கள் யார்? என்பது குறித்தும் போலீசார் விசாரணை நடத்தி வருகின்றனர்.