திருப்பூர் சப்-இன்ஸ்பெக்டர் உள்பட 4 பேர் காயம்

திருப்பூர் மாவட்ட போலீஸ் சூப்பிரண்டு அலுவலகத்தில் பொருளாதார குற்றப்பிரிவு சப்-இன்ஸ்பெக்டராக பணிபுரிந்து வருபவர் சுமதி (வயது 34). இவர் 2 நாள் விடுமுறை எடுத்துக்கொண்டு தனது தந்தை அய்யாத்துரை (73), தாய் ஆண்டாள் (63) ஆகியோருடன் கும்பகோணத்தில் உள்ள கோவிலுக்கு காரில் சென்றார். 

காரை திருப்பூர் மாவட்டம் கே.பி.என். காலனியை சேர்ந்த டிரைவர் சூர்யா (25) ஓட்டி சென்றார்.

சாமி தரிசனம் முடிந்து கரூர் வழியாக திருப்பூருக்கு நேற்று அதிகாலை திரும்பி சென்று கொண்டிருந்தனர். கரூர்-திருச்சி தேசிய நெடுஞ்சாலையில் ஏமூர் பகுதி ரெயில்வே மேம்பாலத்தில் முன்னால் சென்று கொண்டிருந்த கன்டெய்னர் லாரியின் பின்பகுதியில் எதிர்பாராதவிதமாக கார் மோதியது. இந்த விபத்தில் சப்-இன்ஸ்பெக்டர் சுமதி உள்பட 4 பேரும் லேசான காயமடைந்தனர்.

பின்னர் அவர்கள் கரூர் அரசு மருத்துவக்கல்லூரி மருத்துவமனையில் முதலுதவி சிகிச்சை பெற்று வீடு திரும்பினர்.