திருச்சி யானைகள் மறுவாழ்வு முகாமில் கலெக்டர் ஆய்வு

திருச்சி மாவட்டம் எம்.ஆர்.பாளையத்தில் வனத்துறையின் யானைகள் மறுவாழ்வு முகாமில் நேற்று உலக வனநாள் விழா நடைபெற்றது. விழாவையொட்டி மாவட்ட கலெக்டர் எஸ்.சிவராசு, மாவட்ட வன அலுவலர் கிரன் ஆகியோர் மரக்கன்றுகளை நட்டனர். இதனை தொடர்ந்து முகாமில் பராமரிக்கப்படும் 8 யானைகளுக்கு உணவு வழங்கி யானைகளின் பராமரிப்பு மற்றும் செயல்பாடுகள் குறித்து வனத்துறை அலுவலரிடம் கலெக்டர் கேட்டறிந்தார். அப்போது முகாமில் பராமரிக்கப்படும் யானைகளுக்கு வாழைப்பழங்களை அவர் வழங்கினார். பின்னர் மாணவ-மாணவிகளுடன் கலந்துரையாடிய கலெக்டர், வனங்களை பாதுகாப்பதன் அவசியம் குறித்து பேசினார். இந்த நிகழ்ச்சியில் உதவி வனப்பாதுகாவலர் சம்பத்குமார், வனச்சரகர்கள் கோபிநாத், சரவணக்குமார், முருகேசன், தாசில்தார் சக்திவேல் மற்றும் நாளந்தா வேளாண்மைக்கல்லூரி, சிறுகனூர் அரசு மேல்நிலைப்பள்ளி மாணவ-மாணவிகள் உள்பட பலர் கலந்து கொண்டனர். முன்னதாக முகாமின் சாலை பகுதியில் கிடந்த பிளாஸ்டிக் கழிவுகள் உள்ளிட்ட குப்பைகளை வனத்துறை அலுவலர்களுடன் இணைந்து மாணவ-மாணவிகள் அகற்றினர்.