காலி குடங்களுடன் பெண்கள் சட்டசபை நோக்கி ஊர்வலம்

சுகாதாரமான குடிநீர் கேட்டு காலி குடங்களுடன் சட்டசபை நோக்கி கம்யூனிஸ்டு கட்சியினர் ஊர்வலம் சென்றனர்.

முத்தியால்பேட்டை தொகுதி மக்களுக்கு சுகாதாரமான குடிநீர் வழங்கவேண்டும், புதிய பஸ்நிலையம், ரெயில்நிலையம், சோலைநகர் வழியாக இயங்கிய மினி பஸ்களை மீண்டும் இயக்கவேண்டும், மாணவர்கள் சிறப்பு பஸ்சை இயக்கவேண்டும், அனைத்து உயர்கோபுர மின் விளக்குகளையும் சீர் செய்யவேண்டும் என்பன போன்ற கோரிக்கைகளை மார்க்சிஸ்ட் கம்யூனிஸ்டு கட்சி வலியுறுத்தி வருகிறது.

இந்த கோரிக்கைகளை வலியுறுத்தி சட்டசபை நோக்கி காலி குடங்களுடன் ஊர்வலம் நடத்தப்போவதாக அறிவிக்கப்பட்டது. அதன்படி சோலைநகர் இளைஞர் விடுதி அருகிலிருந்து சட்டசபை நோக்கி கம்யூனிஸ்டு கட்சியினர் ஊர்வலம் சென்றனர்.

ஊர்வலத்தில் கலந்துகொண்ட பெண்கள்  காலி குடங்களை தூக்கி வந்தனர். ஊர்வலம் ஜென்மராக்கினி கோவிலை தாண்டி சட்டசபை நோக்கி வந்தபோது அவர்களை போலீசார் தடுத்து நிறுத்தினார்கள். இதைத்தொடர்ந்து அங்கேயே கோரிக்கைகளை வலியுறுத்தி அவர்கள் ஆர்ப்பாட்டத்தில் ஈடுபட்டனர்.

இந்த நூதன போராட்டத்தில் மார்க்சிஸ்டு கம்யூனிஸ்டு மாநில செயலாளர் ராஜாங்கம், மற்றும் நிர்வாகிகள் ராமச்சந்திரன், கொளஞ்சியப்பன், கலியமூர்த்தி, சரவணன், மதிவாணன் உள்பட பலர் கலந்துகொண்டனர்.