குமாரபாளையத்தில் தண்ணீரின் அவசியம் குறித்து என்.சி.சி. மாணவர்கள் ஊர்வலம்

குமாரபாளையம்:

குமாரபாளையம் அரசு ஆண்கள் மேல்நிலைப்பள்ளியில் தேசிய மாணவர் படை சார்பில் உலக தண்ணீர் தின ஊர்வலம் நடந்தது. ஊர்வலத்தை பள்ளி தலைமை ஆசிரியர் ஆடலரசு, உதவி தலைமை ஆசிரியர் அங்கப்ப ராஜ் மற்றும் ரவி ஆகியோர் கொடியசைத்து தொடங்கி வைத்தனர். இதில் தேசிய மாணவர் படையை சேர்ந்த 50-க்கும் மேற்பட்ட மாணவர்கள் கலந்து கொண்டனர். ஊர்வலத்தில் தண்ணீரின் அவசியம் குறித்து பிரகாஷ், பரமன் பாண்டியன் ஆகியோர் பேசினர். மாணவர்கள், மேள தாளங்களுடன் கோஷங்களை எழுப்பி தண்ணீரின் அவசியம் பற்றிய விழிப்புணர்வு பதாகைகள் ஏந்தியும், மக்களிடையே விழிப்புணர்வை ஏற்படுத்தினர். பள்ளி வளாகத்தில் தொடங்கிய இந்த ஊர்வலம் ஆனங்கூர் பிரிவு, சரஸ்வதி தியேட்டர், சந்தைபேட்டை வழியாக மீண்டும் பள்ளியை வந்து நிறைவடைந்தது. இதற்கான ஏற்பாடுகளை தேசிய மாணவர் படை அலுவலர் அந்தோணிசாமி செய்து இருந்தார்.