திருவள்ளுவர் பல்கலைக்கழக அணிக்கான மல்லர்கம்ப வீரர்கள் தேர்வு

விழுப்புரம், 

தேசிய அளவிலான பல்கலைக்கழகங்களுக்கு இடையேயான மல்லர்கம்ப போட்டி ராஜஸ்தான் மாநிலத்தில் அடுத்த மாதம் (ஏப்ரல்) 3-ந் தேதி முதல் 6-ந் தேதி வரை நடைபெறுகிறது. இப்போட்டியில் நாடு முழுவதிலும் இருந்து பல்வேறு பல்கலைக்கழகங்களை சேர்ந்த அணிகள் கலந்துகொள்கின்றன. அந்த வகையில் தமிழகத்தில் திருவள்ளுவர் பல்கலைக்கழகம், அண்ணாமலை பல்கலைக்கழகம், பாரதியார் பல்கலைக்கழகம், பாரதிதாசன் பல்கலைக்கழகம் உள்ளிட்ட பல்வேறு பல்கலைக்கழகங்களை சேர்ந்த அணிகள் பங்கேற்கின்றன. இதையொட்டி திருவள்ளுவர் பல்கலைக்கழகத்திற்கான ஆண்கள் அணியை தேர்வு செய்வதற்கான மல்லர்கம்ப வீரர்கள் தேர்வு இன்று விழுப்புரம் அரசு கலைக்கல்லூரி மைதானத்தில் நடைபெற்றது. இதில் விழுப்புரம், திருவண்ணாமலை, வேலூர், திருப்பத்தூர், கடலூர், கள்ளக்குறிச்சி ஆகிய மாவட்டங்களை சேர்ந்த அரசு மற்றும் தனியார் கல்லூரிகளில் இருந்து 100 மாணவர்கள் கலந்துகொண்டு ஆர்வமுடன் விளையாடி தங்கள் திறமையை நிரூபித்தனர். இந்த போட்டி தேர்வானது விழுப்புரம் அரசு கலைக்கல்லூரி முதல்வர் சிவக்குமார், திருவெண்ணெய்நல்லூர் அரசு கல்லூரி முதல்வர் நாகலட்சுமி, விழுப்புரம் அரசு கலைக்கல்லூரி தமிழ்த்துறை தலைவர் மகாவிஷ்ணு, விழுப்புரம் மாவட்ட கைப்பந்து கழக செயலாளர் மணி, அரசு கல்லூரி உடற்கல்வி இயக்குனர்கள் வரலட்சுமி, ஜோதிப்பிரியா ஆகியோர் முன்னிலையில் நடந்தது. இப்போட்டியில் தேர்வு செய்யப்பட்டவர்கள் ராஜஸ்தானில் நடைபெறும் தேசிய அளவிலான போட்டியில் பங்கேற்க உள்ளனர்.