கடையநல்லூர் அருகே பஸ்-மோட்டார் சைக்கிள் மோதல்; தொழிலாளி பலி

அச்சன்புதூர்:

கடையநல்லூர் பேட்டை நத்கர் பள்ளிவாசல் வடக்கு தெருவைச் சேர்ந்தவர் செய்யது மசூது (வயது 52). இவர் கடையநல்லூர் அருகே இடைகாலில் உள்ள பர்னிச்சர் கடையில் தொழிலாளியாக வேலை செய்து வந்தார். இவர் நேற்று காலையில் வழக்கம்போல் தனது வீட்டில் இருந்து வேலைக்கு மோட்டார் சைக்கிளில் புறப்பட்டு சென்றார். இடைகால் பகுதியில் சென்றபோது, மதுரையில் இருந்து தென்காசிக்கு சென்ற அரசு பஸ் எதிர்பாராதவிதமாக மோட்டார் சைக்கிளின் மீது மோதியது. இதில் பலத்த காயமடைந்த செய்யது மசூது சம்பவ இடத்திலேயே பரிதாபமாக இறந்தார்.

இதுகுறித்து தகவல் அறிந்ததும், இலத்தூர் போலீசார் விரைந்து சென்று, இறந்த செய்யது மசூதுவின் உடலைக் கைப்பற்றி பிரேத பரிசோதனைக்காக தென்காசி அரசு ஆஸ்பத்திரிக்கு அனுப்பி வைத்தனர். இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர். இறந்த செய்யது மசூதுவுக்கு மனைவி மற்றும் 2 மகன்களும், ஒரு மகளும் உள்ளனர்.