மணலூர்பேட்டை பகுதியில் மணல் கடத்தல் மினி லாரி 2 இருசக்கர வாகனங்கள் பறிமுதல் 3 பேர் மீது வழக்கு

திருக்கோவிலூர்

திருக்கோவிலூர் அருகே உள்ள மணலூர்பேட்டை காங்கியனூர் கிராமத்தில்  மணலூர்பேட்டை போலீஸ் சப்-இன்ஸ்பெக்டர் ராஜசேகரன் தலைமையிலான போலீசார் திடீர் வாகன சோதனையில் ஈடுபட்டனர். அப்போது அவ்வழியாக தென்பெண்ணை ஆற்றில் இருந்து மணல் கடத்தி வந்த மினி லாரியை பறிமுதல் செய்த போலீசார் இது தொடர்பாக மேட்டுச்சேரி கிராமத்தைச் சேர்ந்த குப்பன் மகன் ராஜ்குமார்(வயது 39) என்பவர் மீது வழக்குப்பதிவு செய்து விசாரணை நடத்தி வருகின்றனர். 

அதேபோல் கள்ளிப்பட்டி கிராமத்தில் மொபட்டில் மணல் கடத்தி வந்த பச்சமுத்து மகன் அய்யப்பன் என்பவர் மீது வழக்குப்பதிவு செய்த போலீசார் 5 மணல் மூட்டைகளுடன் மொபட்டை பறிமுதல் செய்தனர். ஜம்பை கிராமத்தில் மணல் கடத்தி வந்த சுப்பிரமணியன் மகன் சதீஷ்(22) என்பவரை மடக்கி பிடித்த போலீசார் அவர் மீது வழக்குப்பதிவு செய்து 5 மணல் மூட்டைகளுடன் மோட்டார் சைக்கிளை பறிமுதல் செய்தனர்.