விபத்தில் படுகாயம் அடைந்த வாலிபர் சாவு

குளித்தலை அருகே உள்ள கீழகுட்டப்பட்டி பகுதியை சேர்ந்தவர் கனகராஜ் (வயது 24). இவர் சீட்டு கம்பெனி ஒன்றில் வேலை பார்த்து வந்துள்ளார். நேற்று முன்தினம் வழக்கம்போல் வேலை முடிந்து தனது வீட்டிற்கு மோட்டார் சைக்கிளில் சென்று கொண்டிருந்தார். குளித்தலை- மணப்பாறை சாலையில் அய்யர்மலை அருகே வந்து கொண்டிருந்தபோது தெருநாய் ஒன்று சாலையின் குறுக்கே வந்ததால் அதன் மீது மோதாமல் இருக்க திடீரென பிரேக் போட்டார். இதில், மோட்டார் சைக்கிள் நிலைத்தடுமாறி சாலையோரம் இருந்த புளியமரத்தில் மோதி விபத்துக்குள்ளானது.

இந்த விபத்தில் படுகாயம் அடைந்த கனகராஜை அப்பகுதி மக்கள் மீட்டு குளித்தலை அரசு மருத்துவமனைக்கு அனுப்பி வைத்தனர். பின்னர் மேல் சிகிச்சைக்காக திருச்சியில் உள்ள தனியார் மருத்துவமனையில் அனுமதிக்கப்பட்டார். அங்கு அவருக்கு டாக்டர்கள் தீவிர சிகிச்சை அளித்தனர். ஆனால் சிகிச்சை பலனின்றி கனகராஜ் நேற்று பரிதாபமாக இறந்தார். இந்த விபத்து குறித்து குளித்தலை போலீசார் வழக்குப்பதிவு செய்து விசாரணை நடத்தி வருகின்றனர்.