சேலத்தில் தீயில் கருகிய பெண் சாவு

அன்னதானப்பட்டி, 

சேலம் சீலநாயக்கன்பட்டி பெருமாள் கோவில் மேடு பகுதியை சேர்ந்தவர் ஜேம்ஸ். இவருடைய மனைவி செல்வமேரி (வயது 57). இவர்கள் இருவரும் நேற்று முன்தினம் அன்னதானப்பட்டி பகுதியில் உள்ள ஒரு ஆலயத்துக்கு சென்று பிரார்த்தனை செய்தனர். அப்போது செல்வமேரி அங்கு மெழுகுவர்த்தி ஏற்றிய போது, எதிர்பாராத விதமாக அவரது புடவையில் தீப்பிடித்தது. இதில் தீயில் கருகி படுகாயம் அடைந்த அவரை அங்கிருந்தவர்கள் மீட்டு சீலநாயக்கன்பட்டியில் உள்ள தனியார் மருத்துவமனையில் சிகிச்சைக்காக சேர்த்தனர். தொடர்ந்து மேல் சிகிச்சைக்காக சேலம் அரசு ஆஸ்பத்திரியில் சேர்க்கப்பட்டார். அங்கு அவருக்கு தீவிர சிகிச்சை அளிக்கப்பட்டு வந்தது. இந்த நிலையில் நேற்று காலை செல்வமேரி சிகிச்சைப் பலனின்றி பரிதாபமாக உயிரிழந்தார். இது குறித்து அன்னதானப்பட்டி போலீசார் வழக்குப்பதிவு செய்து விசாரணை நடத்தி வருகின்றனர்.