சேலம் மாநகராட்சியில் 6 நிலைக்குழு தலைவர்கள் போட்டியின்றி தேர்வு நியமனக்குழு உறுப்பினரும் தேர்வு

சேலம்,

நகர்ப்புற உள்ளாட்சி தேர்தல் நடத்தப்பட்டு, சேலம் மாநகராட்சியில் உள்ள 60 வார்டு கவுன்சிலர்கள் தேர்ந்து எடுக்கப்பட்டனர். பின்னர் தலைவர் மற்றும் துணைத்தலைவர் தேர்வு செய்யப்பட்டனர். நேற்று முன்தினம் 4 மண்டல குழு தலைவர்கள் தேர்ந்து எடுக்கப்பட்டனர்.

இதைத்தொடர்ந்து மாநகராட்சியில் உள்ள 6 நிலைக்குழு தலைவர்கள் தேர்ந்து எடுப்பதற்காக மறைமுக தேர்தல் நேற்று மதியம் நடைபெற்றது. மாநகராட்சி ஆணையாளரும், தேர்தல் நடத்தும் அலுவலருமான கிறிஸ்துராஜிடம் வேட்பாளர்கள், வேட்பு மனு தாக்கல் செய்தனர்.

அதன்படி கணக்கு குழு தலைவர் பதவிக்கு மஞ்சுளா (40-வது வார்டு), கல்விக்குழு தலைவர் பதவிக்கு முருகன் (59-வது வார்டு), பொது சுகாதாரக்குழு தலைவர் பதவிக்கு சரவணன் (56-வது வார்டு), வரி மற்றும் நிதிக்குழு தலைவர் பதவிக்கு குமரவேல் (3-வது வார்டு), நகரமைப்புக்குழு தலைவர் பதவிக்கு ஜெயக்குமார் (28-வது வார்டு), பணிகள் குழு தலைவர் பதவிக்கு சாந்தமூர்த்தி (14-வது வார்டு) ஆகியோர் தி.மு.க.சார்பில் மனு தாக்கல் செய்தனர்.

இவர்களை எதிர்த்து யாரும் மனு தாக்கல் செய்ய வில்லை. எனவே தி.மு.க. கவன்சிலர்கள் 6 பேரும் போட்டியின்றி ஒரு மனதாக நிலைக்குழு தலைவர்கள் பதவிக்கு தேர்வு செய்யப்பட்டனர். முன்னதாக நேற்று காலை நடைபெற்ற மறைமுக தேர்தலில் நியமனக்குழு உறுப்பினராக தி.மு.க. கவுன்சிலர் தமிழரசன் (1-வது வார்டு) ஒரு மனதாக தேர்வு செய்யப்பட்டார்.

இதையடுத்து மேயர் ராமச்சந்திரன் முன்னிலையில், ஆணையாளர் கிறிஸ்துராஜ் 6 நிலைக்குழு தலைவர்கள் மற்றும் ஒரு நியமனக்குழு உறுப்பினர் ஆகியோருக்கு அதற்கான சான்றிதழை வழங்கினார். இதில் துணை மேயர் சாரதாதேவி மற்றும் கவுன்சிலர்கள் பலர் கலந்து கொண்டனர்.