ஸ்ரீரங்கம் ரெங்கநாதர் கோவிலில் நம்பெருமாள் கோடை திருநாள்

ஸ்ரீரங்கம், ஏப்.5-
ஸ்ரீரங்கம் ரெங்கநாதர் கோவிலில் நம்பெருமாள் கோடை திருநாள் நாளை தொடங்குகிறது.
கோடை திருநாள்
ஸ்ரீரங்கம் ரெங்கநாதர் கோவிலில் சித்திரை மாதம் நடைபெறும் நம்பெருமாள் கோடை திருநாள் (பூச்சாற்று உற்சவம்) வெளிக்கோடை, உள்கோடை என தலா 5 நாட்கள் வீதம் 10 நாட்கள் நடைபெறுவது வழக்கம்.
இந்தாண்டிற்கான நம்பெருமாள் வெளிக்கோடை திருநாள் நாளை (புதன்கிழமை) மாலை தொடங்கி வருகிற 10-ந் தேதி வரை 5 நாட்கள் நடைபெறுகிறது. வெளிக்கோடை திருநாளின் முதல் நாளான நாளை மாலை 6 மணிக்கு உற்சவர் நம்பெருமாள் மூலஸ்தானத்திலிருந்து புறப்பட்டு இரவு 7 மணிக்கு கோடை நாலுகால் மண்டபத்திற்கு வந்தடைவார். அங்கு புஷ்பம் சாத்துப்படி கண்டருளிய பின் அங்கிருந்து இரவு 8.30 மணிக்கு புறப்பட்டு இரவு 9 மணிக்கு மூலஸ்தானம் சென்றடைவார்.
கஜேந்திரமோட்ச புறப்பாடு
நம்பெருமாள் உள்கோடை திருநாள் வருகிற 11-ந்தேதி தொடங்கி 15-ந்தேதி வரை 5 நாட்கள் நடைபெறுகிறது. 11-ந் தேதி முதல் 14-ந் தேதி வரை வீணை ஏகாந்த சேவையும் நடைபெறுகிறது. வெளிக்கோடை, உள்கோடை திருநாளை முன்னிட்டு வருகிற 15-ந் தேதி வரை இரவு 8 மணிக்கு மேல் மூலஸ்தான சேவை கிடையாது.
வருகிற 10-ந் தேதி ஸ்ரீராமநவமியையொட்டி நம்பெருமாள் சேரகுலவள்ளி தாயார் சேர்த்தி சேவை நடைபெற உள்ளது.  16-ந்தேதி சித்ரா பவுர்ணமி அன்று கஜேந்திரமோட்ச புறப்பாடு காலை 6.30 மணிக்கு நடைபெறுகிறது. மாலை 6.15 மணிக்கு ஸ்ரீரங்கம் அம்மாமண்டபம் காவிரி ஆற்று படித்துறையில் நம்பெருமாள் கஜேந்திரமோட்சம் கண்டருளும் நிகழ்ச்சி நடைபெறுகிறது.
விழாவிற்கான ஏற்பாடுகளை கோவில் இணை ஆணையர் மாரிமுத்து கோவில் உள்துறை கண்காணிப்பாளர் வேல்முருகன், உதவி ஆணையர் கந்தசாமி மற்றும் ஊழியர்கள் செய்து வருகின்றனர்.