விபத்தில் காயமடைந்த விவசாயி சாவு

திருவேங்கடம்:

திருவேங்கடம் தாலுகா அ.கரிசல்குளம் ஆலடிப்பட்டி கிராமத்தை சேர்ந்தவர் சுந்தர்ராஜ் (வயது 45), விவசாயி. இவர், தனது நண்பரான அழகாபுரியை சேர்ந்த ராமர் (30) என்பவருடன் நேற்று முன்தினம் சங்கரன்கோவில் நோக்கி மோட்டார் சைக்கிளில் சென்று கொண்டிருந்தார். அ.கரிசல்குளம் அருகே காலனிக்கு கீழ்ப்புறம் உள்ள ஊருணி அருகே சென்றபோது எதிர்பாராதவிதமாக மோட்டார் சைக்கிள் மீது கார் மோதியது. 

இந்த விபத்தில் ராமர் இறந்தார். காயம் அடைந்த சுந்தர்ராஜ் சிகிச்சைக்காக நெல்லை அரசு ஆஸ்பத்திரியில் சேர்க்கப்பட்டார். அங்கு சிகிச்சை பலனின்றி சுந்தர்ராஜ் நேற்று பரிதாபமாக உயிரிழந்தார். இதுபற்றி திருவேங்கடம் போலீஸ் இன்ஸ்பெக்டர் (பொறுப்பு) காளிராஜன் வழக்குப்பதிவு செய்து விசாரணை நடத்தி வருகிறார். இறந்த சுந்தர்ராஜூக்கு பூமாரி என்ற மனைவியும், 2 மகள்களும் உள்ளனர்.