போலீஸ்காரரை கத்தியால் குத்திய ஆட்டோ டிரைவர் கைது

மும்பை, 

தானே மாவட்டம் பிவண்டியை சேர்ந்த போலீஸ்காரர் ரஞ்சித் பால்வே. இவர் சம்பவத்தன்று இரவு சக போலீசாருடன் அப்பகுதியில் இரவு ரோந்து பணியில் ஈடுபட்டுக்கொண்டு இருந்தார். அப்போது வாட்பே மற்றும் சோனாலே கிராமங்களுக்கு இடையே சாலையில் சந்தேகத்திற்கு இடமாக ஆட்டோ ஒன்று நிற்பதை போலீசார் கண்டனர். போலீசாரை பார்த்ததும் ஆட்டோ ஓட்டுனர் ஆட்டோவுடன் தப்பி செல்ல முயற்சி செய்தார். இதனால் போலீசார் அந்த ஆட்டோவை துரத்தி சென்று மடக்கி நிறுத்தினர்.

அப்போது ஆட்டோவில் இருந்த நபர் திடீரென போலீசாரை கத்தியால் தாக்க முற்பட்டார். இதில் போலீஸ்காரரான ரஞ்சித் பால்வேயின் தலையில் கத்தி பாய்ந்து படுகாயம் அடைந்தார். இருப்பினும் மற்றொரு போலீஸ்காரர் அந்த நபரை மடக்கி பிடித்து கைது செய்தார். 

மேலும் காயம் அடைந்த போலீஸ்காரரை ஆஸ்பத்திரியில் அனுமதித்தனர். அவருக்கு தீவிர சிகிச்சை அளிக்கப்பட்டு வருகிறது. 

பின்னர் நடத்திய விசாரணையில் போலீஸ்காரரை கத்தியால் குத்தியவர் பெயர் உமர் முனிர் சேக்(வயது53) என்பதும், அவர் மீது கல்யாண்- டோம்பிவிலி பகுதியில் பல்வேறு கிரிமினல் வழக்குகள் இருப்பதும் தெரியவந்தது. 

அவரிடம் இருந்து போலீசார் ஒரு கைத்துப்பாக்கியை கைப்பற்றினர். அவர் வைத்திருந்த ஆட்டோவும் திருடப்பட்டது என்று தெரியவந்தது. போலீசார் உமர் முனிர் சேக் மீது கொலை முயற்சி வழக்குப்பதிவு செய்து விசாரணை நடத்தி வருகின்றனர்.