மது அருந்த பணம் தர மறுத்த மனைவியை சுத்தியலால் தாக்கி கொன்ற தொழிலாளி

சென்னை,

சென்னை பழைய வண்ணாரப்பேட்டை தட்டான்குளம் தெருவைச் சேர்ந்தவர் ரவி (வயது 42). கூலித்தொழிலாளியான இவர், வேலைக்குச் செல்லாமல் அடிக்கடி மனைவி சாவித்திரியிடம் தகராறில் ஈடுபட்டு வந்துள்ளார்.

மேலும், அவ்வப்போது மதுஅருந்த பணம் கேட்டு தொந்தரவு செய்துள்ளார். பணம் கொடுக்காதபோது அவரை தாக்கி கொடுமைப்படுத்தி உள்ளார். கடந்த 28.3.2020 அன்று ரவி தனது மனைவியிடம் வழக்கம் போல் மதுஅருந்த பணம் கேட்டுள்ளார். பணம் கொடுக்க மறுத்ததால் ஆத்திரம் அடைந்த அவர், மனைவியை சுத்தியலால் தாக்கினார். இதில் சாவித்திரி உயிரிழந்தார்.

இதுகுறித்து கொருக்குப் பேட்டை போலீசார் வழக்குப்பதிவு செய்து ரவியை கைது செய்தனர். இந்த வழக்கு விசாரணை சென்னை மகளிர் கோர்ட்டில் நீதிபதி டி.எச்.முகமது பாரூக் முன்னிலையில் நடந்தது. போலீசார் தரப்பில் சிறப்பு அரசு வக்கீல் பி.ஆரத்தி ஆஜராகி வாதாடினார். 

வழக்கை விசாரித்த நீதிபதி, ரவி மீதான குற்றச்சாட்டு நிரூபிக்கப்பட்டுள்ளதாக கூறி அவருக்கு ஆயுள்தண்டனையும், ரூ.3 ஆயிரம் அபராதமும் விதித்து தீர்ப்பு கூறினார். மேலும், ஆதரவற்ற நிலையில் இருந்துவரும் 11-வது வகுப்பு படிக்கும் ரவியின் மகன், 8-வது படிக்கும் மகள் ஆகியோருக்கு மாவட்ட சட்டப்பணிகள் ஆணைக்குழு உரிய இழப்பீடு வழங்க வேண்டும் என்றும் நீதிபதி உத்தரவிட்டார்.