ராஷ்ட்ரிய இந்திய ராணுவ கல்லூரியில் சேர விண்ணிப்பிக்கலாம் கலெக்டா் ஸ்ரீதர்

கள்ளக்குறிச்சி, 

டேராடூனில் உள்ள ராஷ்ட்ரிய இந்திய ராணுவ கல்லூரியில் ஜனவரி 2023 கல்வி ஆண்டு பருவத்தில் சேருவதற்கான தேர்வு இந்திய நாட்டில் குறிப்பிட்ட சில இடங்களில் 4-6-2022 அன்று நடைபெற உள்ளது. சென்னை நகரிலும் இத்தேர்வு நடைபெற உள்ளது. 

இத்தேர்வு எழுத்து மற்றும் நேர்முகத் தேர்வுகளை கொண்டதாகும். எழுத்துத்தேர்வு, ஆங்கிலம், கணக்கு மற்றும் பொது அறிவு ஆகிய தாள்களை கொண்டது. கணக்கு மற்றும் பொது அறிவுத்தாள் ஆங்கிலத்தில் அல்லது இந்தியில் விடையளிக்கப்பட வேண்டும். நேர்முகத் தேர்வானது விண்ணப்பத்தாரர்களின் அறிவுக்கூர்மை, தனித்தன்மை போன்றவற்றை ஆராய்வதாக இருக்கும். எழுத்துத்தேர்வின் அடிப்படையில் தகுதியானவர் தேர்வு செய்யப்பட்டு அவர்களுக்கு மட்டும் நேர்முகத் தேர்வு நடத்தப்படும். நேர்முகத் தேர்வு பற்றிய விவரம் பின்னர் அறிவிக்கப்படும். ஒவ்வொரு பாடத்திலும் தேர்வு பெற குறைந்தபட்ச மதிப்பெண் 50 சதவீதம் ஆகும். 

இத்தேர்விற்கான விண்ணப்பப்படிவம் தகவல் தொகுப்பேடு மற்றும் முந்தைய தேர்விற்கான வினாத்தாள் தொகுப்பை கமாண்டன்ட், ராஷ்ட்ரிய இந்திய ராணுவக் கல்லூரி, கர்ஹிகாண்ட், டேராடூன், உத்தரகாண்ட்-248 003 என்ற முகவரிக்கு விரைவு அஞ்சல் வாயிலாக எழுத்து மூலம் விண்ணப்பித்து கமாண்டன்ட், ராஷ்ட்ரிய இந்திய ராணுவக் கல்லூரி, டேராடூன் கேட்பு காசோலைக்குரிய கிளை, ஸ்டேட் பாங்க் ஆப் இந்தியா வங்கி, டெல்பவன், டேராடுன் (வங்கி குறியீடு-01576) உத்தரகாண்ட் செலுத்தத்தக்க பொதுப்பிரிவினர் ரூ.600-க்கான மற்றும் தாழ்த்தப்பட்ட மற்றும் பழங்குடி வகுப்பினர் சாதிச்சான்றுடன் ரூ.555-க்கான கேட்புக் காசோலையை அனுப்பி பெற்றுக் கொள்ளலாம். அல்லது ராஷ்ட்ரிய இந்திய ராணுவக் கல்லூரியின் இணையவழி (website - www.rimc.gov.in) மூலமாக பொதுப்பிரிவினர் ரூ.600 மற்றும் தாழ்த்தப்பட்ட பழங்குடி வகுப்பினர் ரூ.555 செலுத்திப் பெற்றுக் கொள்ளலாம். விண்ணப்பப்படிவம் மற்றும் தகவல் தொகுப்பேடு ஆகியன சென்னையில் உள்ள இத்தேர்வாணைய அலுவலகத்தில் இருந்து விண்ணப்பதாரர்களுக்கு வழங்கப்படமாட்டாது.

ராஷ்ட்ரிய இந்திய ராணுவக் கல்லூரியின் விண்ணப்பப்படிவங்கள் மட்டுமே ஒப்புக்கொள்ளப்படும் மற்றும் தனிப்பட்ட முறையில் அச்சிடப்பட்ட, ஒளிநகல் எடுக்கப்பட்ட ராஷ்ட்ரிய இந்திய ராணுவ கல்லூரி ஹாலோகிராம் முத்திரையிடப்படாத விண்ணப்ப படிவங்கள் நிராகரிக்கப்படும். 

விண்ணப்பதாரர்களின் (சிறுவர்களின்) பெற்றோர் அல்லது பாதுகாப்பாளர் தமிழ்நாட்டில் வசிப்பவராக இருத்தல் வேண்டும். விண்ணப்பதாரர் 1-1-2023 அன்று 11½ வயது நிரம்பியவராகவும், 13 வயதை அடையாதவராகவும் இருத்தல் வேண்டும். அதாவது அவர்கள் 2-1-2010-ந் தேதிக்கு முன்னதாகவும் 1-7-2011-ந் தேதிக்கு பின்னதாகவும் பிறந்திருக்கக்கூடாது. இந்த வயது வரம்பில் எந்த தளர்த்தலும் கிடையாது. விண்ணப்பதாரர் மேற்குறிப்பிட்ட ராணுவ கல்லூரியில் சேர அனுமதிக்கப்படும்போது 1-1-2023-ல் அங்கீகரிக்கப் பெற்ற பள்ளியில் ஏழாம் வகுப்பு படிப்பவராக அல்லது ஏழாம் வகுப்பு தேர்ச்சி பெற்றவராகவோ இருத்தல் வேண்டும்.

பூர்த்தி செய்யப்பட்ட விண்ணப்பப்படிவங்கள் (இரட்டையாக) தேர்வுக் கட்டுப்பாடு அலுவலர், தமிழ்நாடு அரசுப் பணியாளர் தேர்வாணையம், தமிழ்நாடு அரசுப் பணியாளர் தேர்வாணையச் சாலை, பூங்கா நகர், சென்னை-600 003 என்ற முகவரிக்கு வருகிற 25-ந்தேதி மாலை 5.45 மணிக்குள் வந்து சேர வேண்டும். மேலும் மற்ற விவரங்களுக்கு www.rimc.gov.in என்ற ராஷ்ட்ரிய இந்திய இராணுவ கல்லூரியின் இணையதளத்தில் தெரிந்து கொள்ளலாம். 

மேற்கண்ட தகவல் கள்ளக்குறிச்சி மாவட்ட கலெக்டர் ஸ்ரீதர் வெளியிட்டுள்ள செய்திக்குறிப்பில் கூறப்பட்டுள்ளது.