மோட்டார் சைக்கிள் மீது மினி லாரி மோதியதில் பட்டதாரி வாலிபர் பலி

கயத்தாறு அருகே மோட்டார் சைக்கிள் மீது மினி லாரி மோதிய விபத்தில் பட்டதாரி வாலிபர் பலியானர். அவருடைய நண்பர் படுகாயம் அடைந்தார்.

கயத்தாறு அருகே தெற்கு இலந்தைகுளம் பஞ்சாயத்து ஆத்திகுளம் வடக்கு தெருவில் வசிப்பவர் சொரிமுத்து. இவருடைய மகன் சுடலைமணி (வயது 25). பட்டதாரியான இவர் லோடு ஆட்டோ டிரைவராக வேலை செய்து வந்தார். அதே பகுதியைச் சேர்ந்தவர் பட்டு மகன் காளிராஜ் (20). 

நண்பர்களான இவர்கள் 2 பேரும் நேற்று முன்தினம் இரவில் கோவில்பட்டியில் இருந்து கயத்தாறு நோக்கி மோட்டார் சைக்கிளில் சென்று கொண்டிருந்தனர். 

கயத்தாறு அருகே தளவாய்புரம் பஸ் நிறுத்தம் அருகில் சென்றபோது, மதுரையில் இருந்து நெல்லை நோக்கி சென்ற மினி லாரி எதிர்பாராதவிதமாக மோட்டார் சைக்கிளின் மீது மோதியது. இதில் மோட்டார் சைக்கிளில் இருந்து சாலையில் தூக்கி வீசப்பட்டதில் பலத்த காயமடைந்த சுடலைமணி சம்பவ இடத்திலேயே பரிதாபமாக இறந்தார். படுகாயமடைந்த காளிராஜ் உயிருக்கு போராடியவாறு கிடந்தார். இதுகுறித்து தகவல் அறிந்ததும், கயத்தாறு போலீஸ் இன்ஸ்பெக்டர் முத்து மற்றும் போலீசார் சம்பவ இடத்துக்கு விரைந்து சென்று, படுகாயத்துடன் கிடந்த காளிராஜை மீட்டு சிகிச்சைக்காக பாளையங்கோட்டை ஐகிரவுண்டு அரசு ஆஸ்பத்திரிக்கு அனுப்பி வைத்தனர். அங்கு அவருக்கு தீவிர சிகிச்சை அளிக்கப்படுகிறது. 

இறந்த சுடலைமணியின் உடலை போலீசார் கைப்பற்றி பிரேத பரிசோதனைக்காக அதே ஆஸ்பத்திரிக்கு அனுப்பி வைத்தனர். இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர்.