பிரசித்தி பெற்ற நார்த்தாமலை முத்துமாரியம்மன் கோவில் பங்குனி தேரோட்டம் திரளான பக்தர்கள் வடம் பிடித்து இழுத்தனர்

நார்த்தாமலை முத்துமாரியம்மன் கோவில் திருவிழாவில் தேரோட்டத்தை காண மாவட்டம் முழுவதும் இருந்தும், திருச்சி உள்பட பக்கத்து மாவட்டங்களில் இருந்தும் ஏராளமான பக்தர்கள் வருகை தந்தனர். இதனால் நார்த்தாமலையில் எங்கு திரும்பினாலும் பக்தர்கள் கூட்டமாக நிரம்பி காணப்பட்டது. இதற்கிடையில் திருச்சியில் இருந்து புதுக்கோட்டை செல்லும் தேசியநெடுஞ்சாலையில் நார்த்தாமலை கோவில் நுழைவு வாயில் அருகில் இருந்து சாலையில் இருபுறமும் போக்குவரத்து பாதிப்படைந்தது. வாகனங்கள் சாலையில் இருபுறமும் நீண்ட வரிசையில் அணிவகுத்து நின்றன. புதுக்கோட்டையில் இருந்து திருச்சி மார்க்கமாக சென்ற பஸ்கள், வாகனங்கள் நீண்ட நேரம் காத்திருந்தன. பகல் 1 மணி அளவில் தொடங்கிய போக்குவரத்து பாதிப்பு நேற்று மாலை தேரோட்டம் முடிந்த பின்பும் நீடித்தது. இதனால் வாகனஓட்டிகள் கடும் அவதி அடைந்தனர். போலீசார் பாதுகாப்பு பணியில் இருந்தாலும் கூடுதலாக திட்டமிட்டு இருந்தால் இந்த போக்குவரத்து பாதிப்பு ஏற்பட்டிருக்காது என பக்தர்கள் பேசிக்கொண்டனர். இந்த போக்குவரத்து நெரிசலில் கலெக்டர் கவிதாராமு வந்த வாகனமும், 108 ஆம்புலன்சும் சிக்கிக்கொண்டது. அதன்பின் போக்குவரத்து சற்று ஒழுங்குபடுத்திய பின் கலெக்டர் கார், 108 ஆம்புலன்சு சென்றது.

கொரோனா ஊரடங்கின் காரணமாக கடந்த 2020-ம் ஆண்டு திருவிழா நடைபெறவில்லை. கடந்த 2021-ம் ஆண்டும் கொரோனா ஊரடங்கால் திருவிழா நடைபெறாமல், தேரோட்டம் மட்டும் திடீரென நடைபெற்றது. இதனால் பக்தர்கள் அதிக அளவில் அப்போது கோவிலுக்கு வரமுடியவில்லை. தற்போது கொரோனா கட்டுப்பாடுகள் தளர்வு அளிக்கப்பட்ட நிலையில் இந்த ஆண்டு திருவிழா வெகுவிமரிசையாக நடைபெற்றது. இதில் தேரோட்டத்தை காண லட்சக்கணக்கான பக்தர்கள் நேற்று வருகை தந்தனர். 2 ஆண்டுகளுக்கு பிறகு இந்த ஆண்டில் தேரோட்டத்தில் பக்தர்கள் கூட்டம் அலைமோதியது குறிப்பிடத்தக்கது.

தேரோட்டத்தை காணவந்த பக்தர்கள் சிலர், இளைஞர்கள், இளம்பெண்கள் கோவில் அருகே உள்ள மலையின் உச்சியின் மேல் ஏறி நின்று வேடிக்கை பார்த்தனர். மலையின் உச்சியில் செல்வதற்கு சரியான பாதைகள் எதுவும் இல்லாத நிலையில் அவர்கள் பாறையில் ஏறி மலை உச்சிக்கு ஆபத்தான பயணத்தை மேற்கொண்டனர்.

தேரோட்டத்திற்கு வருகை தந்த பக்தர்களுக்கு நார்த்தாமலையில் அன்னதானம், நீர் மோர் வழங்கப்பட்டன. இதேபோல கீரனூரில் இருந்து நார்த்தாமலை வரையும், புதுக்கோட்டையில் இருந்து நார்த்தாமலை வரையும் சாலையின் இரு புறமும் ஆங்காங்கே அன்னதானம் வழங்கப்பட்டன. இதில் பக்தர்கள் பலர் அமர்ந்து சாப்பிட்டனர். இதேபோல தண்ணீர் பந்தல் அமைக்கப்பட்டு நீர், மோர், சர்பத் வினியோகிக்கப்பட்டன.

திருவிழாவையொட்டி கீரனூா் லட்சுமி எண்டர்பிரைசஸ் நிறுவனத்தின் சார்பாக குளத்தூரில் தண்ணீர் பந்தல் அமைக்கப்பட்டு பக்தர்களுக்கு நீர், மோர் வழங்கப்பட்டது.