தர்மபுரியில் மொத்த விற்பனை நிலையங்களில் ‘சிரஞ்ச் சாக்லெட்டு’கள் பறிமுதல்-உணவு பாதுகாப்புத்துறை அதிகாரிகள் அதிரடி

தர்மபுரி:

தர்மபுரி பகுதியில் உள்ள சாக்லெட் மொத்த விற்பனை நிலையங்களில் உணவு பாதுகாப்பு துறையினர் திடீர் ஆய்வு மேற்கொண்டனர். அப்போது உடலுக்கு தீங்கு விளைவிக்கும் ‘சிரஞ்ச் சாக்லெட்’டுகள் பறிமுதல் செய்யப்பட்டன.

தமிழகம் முழுவதும் கடந்த சில தினங்களாக ஊசி போடும் சிரஞ்சில் சாக்லெட் மற்றும் ஜெல்லி போன்ற இனிப்பு திரவங்கள் நிரப்பி விற்பனை செய்யப்படுவதாக தொடர்ச்சியாக புகார்கள் வந்தன. இதையடுத்து தர்மபுரி மாவட்டத்தில் உள்ள சாக்லெட் விற்பனை நிலையங்களில் அதிகாரிகள் சோதனை நடத்த கலெக்டர் திவ்யதர்சினி உத்தரவிட்டார். அதன்பேரில் மாவட்ட உணவு பாதுகாப்பு துறை மாவட்ட நியமன அலுவலர் பானு சுஜாதா தலைமையில் உணவு பாதுகாப்பு அலுவலர்கள் நந்தகோபால், குமணன் உள்ளிட்ட குழுவினர் தர்மபுரி உள்ளிட்ட பல்வேறு பகுதிகளில் திடீர் ஆய்வு மேற்கொண்டனர்.

தர்மபுரி நகரில் ஆறுமுகம் ஆசாரி தெரு, அப்துல் முஜிப் தெரு, அகமது பாஷா தெரு, கடைவீதி மற்றும் கடத்தூர் உள்ளிட்ட பகுதிகளில் குழந்தைகள் விரும்பி உண்ணும் சாக்லெட்டுகள், மிட்டாய் வகைகள் விற்பனை செய்யும் மொத்த விற்பனை கடைகளில் திடீரென ஆய்வு செய்தனர். இந்த ஆய்வில் 2 கடைகளில் ஊசி போடும் சிரஞ்சில் சாக்லெட் நிரப்பி சிரஞ்ச் சாக்லெட் என 30 எண்ணிக்கையில் சிலீட்ட ஜார்களில் விற்பனை செய்வது கண்டறியப்பட்டது. அந்த சிரஞ்ச் சாக்லெட்டில் உடலுக்கு தீங்குவிளைவிக்கும் காரணிகள் மற்றும் அளவிற்கு அதிகமான செயற்கை நிறமுட்டிகள் உள்ளனவா?, அது உண்ண தகுந்ததா என கண்டறிய அவற்றை அதிகாரிகள் பறிமுதல் செய்தனர். மேலும்  இந்த சாக்லெட்டுகள் பகுப்பாய்வுக்கு அனுப்பி பரிசோதனை முடிவு அடிப்படையில் தயாரிப்பாளர், வினியோகிப்பாளர் மற்றும் விற்பனையாளர் மீது வழக்கு தொடரப்படும் என மாவட்ட நியமன அலுவலர் பானு சுஜாதா தெரிவித்தார்.

இது போன்ற சிரஞ்ச் சாக்லெட்டுகள், சிகரெட் வடிவிலான மிட்டாய்கள், பாக்கெட்டுகளில் உரிய உணவு பாதுகாப்பு உரிமம் எண், தயாரிப்பு முகவரி, தயாரிப்பு தேதி, முடிவு தேதி இல்லாத சாக்லெட்டுகள், ஜெல்லி மிட்டாய்கள், துரித தின்பண்டங்கள் மற்றும் குளிர்பான பாக்கெட்டுகள், பாட்டில்கள், ஐஸ் டியூப் உள்ளிட்டவைகளை மொத்த விற்பனையாளர்கள், சிறு வணிகர்கள் விற்பனை செய்வதை கண்டிப்பாக தவிர்க்க வேண்டும் என்று உணவு பாதுகாப்பு துறை அதிகாரிகள் கேட்டு கொண்டனர்.

இந்த ஆய்வின் போது சம்பந்தப்பட்ட கடைகளில் உரிய விவரங்கள் குறிப்பிடாத தின்பண்டங்கள், பிஸ்கெட்டுகள், நிப்பட் பாக்கெட்டுகள், இனிப்பு மிட்டாய்கள் மற்றும் காலாவதியான பொருட்கள் விற்பனை செய்த விற்பனையாளர்கள் 3 பேருக்கு தலா ரூ.2 ஆயிரம் அபராதம் விதிக்கப்பட்டது.