கடனை திரும்ப தராததால் வாலிபர் அடித்து கொலை; ரவுடி உள்பட 3 பேர் கைது

கதக்:

  கதக் டவுன் பெட்டகேரி பகுதியில் வசித்து வந்தவர் பரமகவுடா (வயது 26). இவர் கடந்த ஓராண்டுக்கு முன்பு ரவுடியான உமேஷ் என்பவரிடம் இருந்து ரூ.2 லட்சம் கடன் வாங்கி இருந்தார். அதில் ரூ.1 லட்சத்தை பரமகவுடா திரும்ப கொடுத்து விட்டார். மீதம் ரூ.1 லட்சத்தை பரமகவுடா, உமேசுக்கு திரும்ப தரவில்லை என்று தெரிகிறது. இதனால் ஆத்திரம் அடைந்த உமேஷ், பரமகவுடாவிடம் நான் கொடுத்த கடனுக்கு வட்டியாக ரூ.5 லட்சம் தர வேண்டும் என்று கேட்டு உள்ளார். ஆனால் இதற்கு பரமகவுடா மறுத்து விட்டதாக தெரிகிறது.

  இதனால் கடந்த ஒரு மாதத்திற்கு முன்பு பரமகவுடாவை, உமேஷ் தனது கூட்டாளிகளான உதய், விக்ரம் ஆகியோருடன் சேர்ந்து கடத்தி ஒரு வீட்டில் சிறை வைத்து தாக்கி உள்ளார். இதில் பலத்த காயம் அடைந்த பரமகவுடா அந்த வீட்டில் இருந்து தப்பி வந்தார். பின்னர் அவர் கதக் அரசு ஆஸ்பத்திரியில் அனுமதிக்கப்பட்டு இருந்தார். இந்த நிலையில் சிகிச்சை பலன் அளிக்காமல் நேற்று பரமகவுடா பரிதாபமாக இறந்தார். இதுகுறித்து பரமகவுடாவின் தாய் அளித்த புகாரின்பேரில் பெட்டகேரி போலீசார் வழக்குப்பதிவு செய்து உமேஷ், உதய், விக்ரமை கைது செய்தனர்.

  இதுபோல கோலார் மாவட்டம் பங்காருபேட்டையை சேர்ந்தவர் ஹரீஷ் (20). இவர் நேற்று முன்தினம் இரவு தனது நண்பர்களுடன் சேர்ந்து மதுஅருந்தினார். அப்போது குடிபோதையில் ஏற்பட்ட தகராறில் ஹரீசை, அவரது நண்பர்கள் தலையில் கல்லை போட்டு கொலை செய்து விட்டு தப்பி சென்று விட்டனர்.

  இந்த கொலை சம்பவம் குறித்து வழக்குப்பதிவு செய்த பங்காருபேட்டை போலீசார் தப்பி ஓடிய ஹரீசின் நண்பர்களை வலைவீசி தேடிவருகின்றனர்.