மரவள்ளி பயிரில் மாவுப்பூச்சியை கட்டுப்படுத்த விவசாயிகளுக்கு ஒட்டுண்ணி வினியோகம்

நாமக்கல்:

நாமக்கல் மாவட்டத்தில் பிரதான தோட்டக்கலை பயிரான மரவள்ளி ஆண்டு தோறும் சுமார் 18 ஆயிரம் ஹெக்டர் பரப்பளவில் சாகுபடி செய்யப்படுகிறத. இதில் கடந்த 2 ஆண்டுகளாக மரவள்ளி பயிரில் மாவுப்பூச்சியின் தாக்கம் அதிகரித்து பெரும் பொருளாதார சேதத்தை விளைவித்தது. இந்த மாவுப்பூச்சியை கட்டுப்படுத்த புதிய ரக ஒட்டுண்ணி அனகைரஸ் லோபெஸி-ஐ நாமக்கல் வேளாண் அறிவியல் நிலையமும், பெங்களூருவில் உள்ள தேசிய வேளாண் பூச்சிகள் மூலாதார அமைவகமும் இணைந்து 50 விவசாயிகளுக்கு வழங்கின.

இந்த நிகழ்ச்சிக்கு வேளாண் அறிவியல் மைய தலைவர் அழகுதுரை தலைமை தாங்கினார். இதில் உழவர் பயிற்சி நிலைய வேளாண் துணை இயக்குனர் நாச்சிமுத்து, தோட்டக்கலைத்துறை துணை இயக்குனர் கணேசன் மற்றும் வேளாண் இணை இயக்குனர் அசோகன் ஆகியோர் சிறப்பு அழைப்பாளர்களாக கலந்து கொண்டு பேசினர். இதைத் தொடர்ந்து தேசிய வேளாண் பூச்சிகள் மூலாதார அமைவக நிலையத்தின் முதன்மை விஞ்ஞானி மோகன் மாவுபூச்சி புதிய ரக ஒட்டுண்ணியை உற்பத்தி செய்யும் முறைக்கான கையேடு ஒன்றை வெளியிட்டு அதன் வாழ்க்கை சுழற்சியை விளக்கினார். மேலும் அதே மையத்தை சேர்ந்த டாக்டர் சம்பத்குமார் இப்புதிய ரக ஒட்டுண்ணியை வயல் வெளிவிடுதல் தொழில்நுட்பங்களை சிறப்பாக எடுத்துரைத்தார்.

வேளாண் அறிவியல் நிலைய பூச்சியியல் துறையை சார்ந்த உதவி பேராசிரியர் சங்கர், இந்த புதிய ரக ஒட்டுண்ணிகளை பெருமளவில் விவசாயிகளே உற்பத்தி செய்யும் முறையினை விவசாயிகளுக்கு செயல்விளக்கம் மூலம் செய்து காண்பித்தார். இதில் நாமக்கல் மாவட்டத்தில் மரவள்ளி சாகுபடி செய்யும் 75 விவசாயிகள் கலந்து கொண்டு பயனடைந்தனர்.முடிவில் வேளாண் அறிவியல் நிலைய உழவியல் துறை உதவி பேராசிரியர் முருகன் நன்றி கூறினார்.