சாராயம் விற்றதாக கைது செய்யப்பட்டு சிறையில் அடைக்கப்பட்டவர் ‘திடீர்’ சாவு

திருவண்ணாமலை அரசு மருத்துவக்கல்லூரி மருத்துவமனையில் நேற்று மாலை திருவண்ணாமலை குற்றவியல் நீதிமன்ற மாஜிஸ்திரேட்டு பாக்கியராஜ் முன்னிலையில் பிரேத பரிசோதனை நடைபெற்றது.

மேலும் தங்கமணியின் உறவினர்களிடம் மாஜிஸ்திரேட்டு விசாரணை நடத்தினார். இதையடுத்து தங்கமணியின் உடல் அவரது உறவினர்களிடம் ஒப்படைப்பதற்கான பணி நடைபெற்றது.

இதற்கிடையில் அவரது உறவினர்கள், தங்கமணியின் முகம் மற்றும் கையில் காயங்கள் உள்ளது. அவரது சாவில் சந்தேகம் உள்ளது. எனவே பிரேத பரிசோதனை அறிக்கை வந்த பிறகு தான் நாங்கள் உடலை வாங்குவோம். அதுவரை உடலை வாங்க மாட்டோம் என்று தெரிவித்தனர். இதையடுத்து அவர்கள் தங்கமணியின் உடலை வாங்காமல் ஒரு சிலரை தவிர மற்ற அனைவரும் அங்கிருந்து கலைந்து சென்றனர். இதனால் மருத்துவமனை வளாகத்தில் சிறிது நேரம் பரபரப்பு ஏற்பட்டது.

உயிரிழந்தவரின் மனைவி கலெக்டரிடம் பரபரப்பு புகார்

தங்கமணியின் மரணம் தொடர்பாக அவர் மனைவி மலர், திருவண்ணாமலை கலெக்டர் முருகேசிடம் கொடுத்துள்ள புகார் மனுவில் கூறியிருப்பதாவது:-

மதுவிலக்கு பிரிவு போலீசார் எங்கள் ஊர் மக்களை தொடர்புகொண்டு சாராயம் காய்ச்ச சொல்லியும், மாதந்தோறும் ரூ.1 லட்சம் தர வேண்டும் என்றும், இல்லையென்றால் ஊர் மக்கள் அனைவர் மீதும் குண்டர் சட்டம் போட்டு சிறையில் தள்ளிவிடுவோம் என்றும் மிரட்டி வந்தார்கள்.

அதேபோல் எங்கள் ஊரை சேர்ந்த 2 பேர் மீது பொய்யாக குண்டர் சட்டத்தில் வழக்கு போட்டுவிட்டார்கள். இதேபோன்று என் கணவரையும் (தங்கமணி) மிரட்டி பணம் பறிக்க முயன்றார்கள். என் கணவரோ நாங்கள் எந்த குற்றச்செயலும் செய்யவில்லை. அதனால் லஞ்சம் தர முடியாது என்று கூறிவிட்டார். இதையடுத்து என் கணவர் மீது பொய்வழக்கு போட்டு திருவண்ணாமலை கிளை சிறையில் அடைத்தனர். அங்கு அவர் தாக்கப்பட்டு உயிரிழந்துள்ளார். மேலதிகாரிகளிடம் எதுவும் சொல்லக்கூடாது என எங்களை மிரட்டுகின்றனர்.

எனது கணவர் மரணத்துக்கு காரணமான போலீஸ் இன்ஸ்பெக்டர், 2 போலீசார் மற்றும் சிறை கண்காணிப்பாளர் மீது நடவடிக்கை எடுத்து, எங்களுக்கு தகுந்த நியாயம் கிடைக்க நடவடிக்கை எடுக்க வேண்டும்,

இவ்வாறு அவர் தெரிவித்துள்ளார்.