கோக்கலை கிராமசபை கூட்டத்தில் பொதுமக்கள் காத்திருப்பு போராட்டத்தால் பரபரப்பு தாசில்தார் பேச்சுவார்த்தை

எலச்சிபாளையம்:

எலச்சிபாளையம் ஒன்றியம் கோக்கலை ஊராட்சியில் உள்ள அரசு பள்ளிக்கூடத்தில் நேற்று சிறப்பு கிராமசபை கூட்டம் நடந்தது. ஊராட்சி தலைவர் கந்தசாமி தலைமை தாங்கினார். மண்டல துணை வட்டார வளர்ச்சி அலுவலர் நீலாவதி, கிராம நிர்வாக அலுவலர் மல்லிகா ஆகியோர் முன்னிலை வகித்தனர். கூட்டம் தொடங்கியதும் பொதுமக்கள் கோக்கலை எளையாம்பாளையம் பகுதியில் கல்குவாரிகள் பிரச்சினை குறித்து கடந்த 2 ஆண்டுகளுக்கு முன் நடந்த கிராமசபை கூட்டத்தில் நிறைவேற்றிய தீர்மானத்திற்கு முடிவு என்ன என கேட்டனர். பின்னர் இதற்கு உரிய அதிகாரிகள் வந்து பதில் சொல்லும் வரை இங்கிருந்து செல்லமாட்டோம் என கூறி காத்திருப்பு போராட்டம் நடத்தினர். இதனால் அங்கு பரபரப்பு ஏற்பட்டது.  இதுகுறித்து தகவல் அறிந்த திருச்செங்கோடு தாசில்தார் அப்பன்ராஜ் அங்கு விரைந்து சென்றார். பின்னர் அவர் பொதுமக்களிடம் ஒரு வார காலத்திற்குள் பொதுமக்களின் கோரிக்கை குறித்து நடவடிக்கை எடுக்கப்படும் என உத்தரவாதம் அளித்தார். இதை தொடர்ந்து பொதுமக்கள் சமாதானம் அடைந்தனர். இதையடுத்து கூட்டம் முடிவடைந்தது.