பெரம்பலூரில் 7,858 மாணவர்கள் பிளஸ்-2 பொதுத்தேர்வு எழுத உள்ளனர்

தமிழகம் முழுவதும் பிளஸ்-2 மாணவ-மாணவிகளுக்கு 2021-22-ம் கல்வி ஆண்டிற்கான அரசு பொதுத்தேர்வுநாளை (வியாழக்கிழமை) தொடங்கி வருகிற 28-ந் தேதி வரை நடைபெறுகிறது. அதன்படி பெரம்பலூர்- அரியலூர் மாவட்டங்களில் அரசு பள்ளிகள், அரசு ஆதிதிராவிடர் நல பள்ளிகள், அரசு உதவி பெறும் பள்ளிகள், தனியார் மற்றும் சுயநிதி பள்ளிகளில் பிளஸ்-2 பயிலும் மாணவ- மாணவிகள் அரசு பொதுத் தேர்வினை எழுதவுள்ளனர். நாளை தமிழ் தேர்வு நடக்கிறது. காலை 10 மணிக்கு தொடங்கி மதியம் 1.15 மணி வரை நடக்கிறது. பெரம்பலூர் மாவட்டத்தில் பிளஸ்-2 அரசு பொதுத்தேர்வினை 75 பள்ளிகளை  சேர்ந்த 4,023 மாணவர்களும், 3,835 மாணவிகளும் என மொத்தம் 7,858 பேர் 32 தேர்வு மையங்களில் தேர்வு எழுதவுள்ளனர்.