முன்னாள் சிறப்பு டி.ஜி.பி. மீதான விசாரணை 25-ந் தேதிக்கு ஒத்திவைப்பு

விழுப்புரம்

பெண் ஐ.பி.எஸ். அதிகாரி ஒருவருக்கு சிறப்பு டி.ஜி.பி. பாலியல் தொல்லை அளித்ததாக தொடரப்பட்ட வழக்கு விசாரணை விழுப்புரம் தலைமை குற்றவியல் நீதிமன்றத்தில் நடந்து வருகிறது. இவ்வழக்கின் புகார்தாரரான பெண் ஐ.பி.எஸ். அதிகாரியிடம் முன்னாள் சிறப்பு டி.ஜி.பி. தரப்பு வக்கீல், குறுக்கு விசாரணையை தொடங்கி 11 நாட்கள் நடத்தியுள்ள நிலையில் இன்னும் அந்த விசாரணை நிறைவடையவில்லை.

இந்நிலையில் நேற்று இவ்வழக்கு விசாரணைக்கு வந்தபோது முன்னாள் சிறப்பு டி.ஜி.பி., செங்கல்பட்டு மாவட்ட முன்னாள் போலீஸ் சூப்பிரண்டு மற்றும் புகார்தாரரான பெண் ஐ.பி.எஸ். அதிகாரி ஆகிய 3 பேரும் நேரில் ஆஜரானார்கள். அதனை தொடர்ந்து பெண் ஐ.பி.எஸ். அதிகாரியிடம் முன்னாள் சிறப்பு டி.ஜி.பி. தரப்பு குறுக்கு விசாரணை செய்யலாம் என்று நீதிபதி புஷ்பராணி கூறினார். 

அதற்கு முன்னாள் சிறப்பு டி.ஜி.பி. தரப்பு வக்கீல் ஆஜராகி எங்களது மூத்த வக்கீல் ஆஜராக முடியாத காரணத்தால் பெண் ஐ.பி.எஸ். அதிகாரியிடம் குறுக்கு விசாரணை நடத்துவதற்கு கால அவகாசம் வழங்கும்படி கேட்டு மனுத்தாக்கல் செய்தார். இந்த மனுவை ஏற்ற நீதிபதி புஷ்பராணி, இவ்வழக்கின் விசாரணையை வருகிற 25-ந் தேதிக்கு ஒத்திவைத்து உத்தரவிட்டார்.