சாகுபடிக்கு பயன்படுத்தும் விதைகளின் தரத்தை உறுதி செய்ய பரிசோதனை அவசியம்

தர்மபுரி:-

தர்மபுரி மாவட்ட விதை பரிசோதனை அலுவலர் அருணா வெளியிட்டுள்ள செய்திக்குறிப்பில் கூறப்பட்டுள்ளதாவது:-

பயிர்களை பராமரிக்க நல்ல முளைப்புத்திறன் கொண்ட விதைகளை பயன்படுத்தும்போது விதை செலவு குறைகிறது. புறத்தூய்மை பரிசோதனையில் பிற பயிர் விதை மற்றும் களைச்செடி கலப்புகள் உள்ளதா? என்று கண்டறிய படுவதால் விதைகளின் தூய்மை உறுதி செய்யப்படுகிறது. விதைகளை சேமிக்கும்போது பூச்சி நோய் தாக்குதல் காரணமாக முளைப்புத்திறன் கெடாமல் இருக்க விதைகளின் ஈரப்பதம் குறிப்பிட்ட அளவுக்கு மேல் இருக்கக்கூடாது. இதனால் விதைகளின் முளைப்புத் திறனை பாதுகாக்க விதை பரிசோதனை மூலம் ஈரப்பதத்தை தெரிந்து கொள்வது அவசியமாகும். எனவே விதை விற்பனையாளர்கள் மற்றும் விவசாயிகள் விதைப்புகாக சேமித்து வைத்திருக்கும் விதைகளின் தரத்தை அறிந்து கொள்ள தங்களிடம் உள்ள விதை மாதிரிகளை முகப்பு கடிதத்துடன் தர்மபுரி மாவட்ட கலெக்டர் அலுவலக வளாகத்தில் செயல்படும் விதை பரிசோதனை நிலையத்திற்கு தபால் மூலம் அனுப்பலாம். விதைகளின் பரிசோதனை முடிவுகள் 30 நாட்களுக்குள் சம்பந்தப்பட்ட விவசாயிகளின் முகவரிகளுக்கு அனுப்பி வைக்கப்படும்.

இவ்வாறு அதில் கூறப்பட்டுள்ளது.