சாலையோர மரத்தில் கார் மோதி வாலிபர் பலி

திசையன்விளை:

கேரள மாநிலம் திருவனந்தபுரம் பகுதியைச் சேர்ந்தவர் சிராஜ். இவருடைய மகன் உஸ்மான் (வயது 19). இவர் தன்னுடைய நண்பர்களுடன் காரில் நாகூர் தர்காவுக்கு சென்று விட்டு திரும்பி வந்து கொண்டிருந்தார். நேற்று இரவு நெல்லை மாவட்டம் உவரி அருகே காரிகோவில் பத்திரகாளி அம்மன் கோவில் அருகில் வளைவில் திரும்பியபோது எதிர்பாராதவிதமாக கார் நிலைதடுமாறி சாலையோர மரத்தில் பயங்கரமாக மோதியது.

இந்த விபத்தில் காரில் இருந்த உஸ்மான் பலத்த காயமடைந்து சம்பவ இடத்திலேயே பரிதாபமாக இறந்தார். மேலும் காரை ஓட்டி வந்த அப்துல்லா (23) மற்றும் ஷாகீர் (19), செய்யது (18) ஆகிய 3 பேரும் படுகாயம் அடைந்தனர். உடனே அவர்களை நாகர்கோவில் தனியார் ஆஸ்பத்திரியில் அனுமதித்து தீவிர சிகிச்சை அளித்து வருகின்றனர். இதுகுறித்து உவரி போலீசார் வழக்குப்பதிவு செய்து விசாரணை நடத்தி வருகின்றனர்.