சரக்கு வேன் மோதி வாலிபர் பலி; 2 பேருக்கு தீவிர சிகிச்சை

மணப்பாறையை அடுத்த மறவனூர் அருகே திண்டுக்கல்- திருச்சி தேசிய நெடுஞ்சாலையில் மோட்டார் சைக்கிளில் 3 பேர் சென்று கொண்டிருந்தனர். அப்போது மணப்பாறையில் இருந்து திருச்சி நோக்கி சென்ற சரக்கு வேன் எதிர்பாராதவிதமாக மோட்டார் சைக்கிள் மீது மோதியது. இந்த விபத்தில் மோட்டார் சைக்கிளில் சென்ற திண்டுக்கல் மாவட்டம், வேடசந்தூர் வ.உ.சி. நகரை சேர்ந்த குமார் (வயது 19), தமனம்பட்டியை சேர்ந்த துளசி (20), சக்திவேல் (21) ஆகிய 3 பேரும் படுகாயமடைந்தனர். 

இதையடுத்து, அந்த வழியாக சென்ற வாகன ஓட்டிகள் அவர்கள் 3 பேரையும் மீட்டு மணப்பாறை அரசு மருத்துவமனைக்கு அனுப்பி வைத்தனர். ஆனால் செல்லும் வழியிலேயே சக்திவேல் பரிதாபமாக இறந்தார். இதையடுத்து படுகாயம் அடைந்த 2 பேருக்கும் டாக்டர்கள் தீவிர சிகிச்சை அளித்து வருகிறார்கள். இந்த விபத்து குறித்து மணப்பாறை போலீசார் விசாரணை நடத்திய போது விபத்தில் சிக்கிய மோட்டார் சைக்கிளை கிருஷ்ணகிரியில் இருந்து நேற்று முன்தினம் இரவு இவர்கள் திருடிக்கொண்டு வந்தது தெரியவந்தது. இந்த விபத்து குறித்து மணப்பாறை போலீசார் வழக்குப்பதிவு செய்து விசாரணை நடத்தி வருகின்றனர்.