கிருஷ்ணகிரி மாவட்டத்தில் வெவ்வேறு சாலை விபத்தில் 4 பேர் பலி

கிருஷ்ணகிரி:

கிருஷ்ணகிரி மாவட்டத்தில் வெவ்வேறு  இடங்களில் நடந்த சாலை விபத்தில் 4 பேர் பலியானார்கள்.

கிருஷ்ணகிரி அருகே உள்ள மாதேப்பள்ளி பக்கமுள்ள சின்னகுலமலையை சேர்ந்தவர் திம்மப்பன் (வயது 70). சம்பவத்தன்று இவர் கிருஷ்ணகிரி ரவுண்டானா அருகில் பெங்களூரு சாலையில் உள்ள பஸ் நிறுத்தம் பக்கமாக நடந்து சென்றார். அப்போது அந்த வழியாக சென்ற அரசு பஸ் அவர் மீது மோதியது.

இதில் பலத்த காயம் அடைந்த திம்மப்பனை அருகில் இருந்தவர்கள் மீட்டு சிகிச்சைக்காக கிருஷ்ணகிரி அரசு ஆஸ்பத்திரியில் சேர்த்தனர். அங்கு சிகிச்சை பலனின்றி முதியவர் பரிதாபமாக இறந்தார். இதுகுறித்து கிருஷ்ணகிரி டவுன் போலீசார் வழக்குப்பதிவு செய்து விசாரணை நடத்தி வருகிறார்கள்.

கிருஷ்ணகிரி தாலுகா பில்லனகுப்பம் அருகே உள்ள போலுப்பள்ளியை சேர்ந்தவர் வெங்கடேசன் (58). விவசாயி. இவர் ஓசூர் - கிருஷ்ணகிரி சாலையில் புலியரசி மேடு பக்கமாக நடந்து சென்றார். அப்போது அந்த வழியாக சென்ற பஸ் அவர் மீது மோதியது. இதில் வெங்கடேசன் சம்பவ இடத்திலேயே பலியானார். இந்த விபத்து குறித்து குருபரப்பள்ளி போலீசார் விசாரணை நடத்தி வருகிறார்கள்.

விருதுநகர் மாவட்டம் சிவகாசி தாலுகா விஜயபரிசல்குளத்தை சேர்ந்தவர் ராமசாமி (55). லாரி டிரைவர். இவர் கிருஷ்ணகிரி-ஓசூர் தேசிய நெடுஞ்சாலையில் கொல்லப்பள்ளி பக்கமாக லாரியை ஓட்டி சென்று கொண்டிருந்தார். அப்போது அந்த வழியாக வந்த மற்றொரு லாரி, ராமசாமி ஓட்டி சென்ற லாரி மீது மோதியது.

இதில் பலத்த காயம் அடைந்த ராமசாமி கிருஷ்ணகிரி அரசு ஆஸ்பத்திரியில் அனுமதிக்கப்பட்டார். அங்கு தீவிர சிகிச்சை அளித்தும் பலனின்றி அவர் பரிதாபமாக இறந்தார். இந்த விபத்து குறித்து சூளகிரி போலீசார் விசாரணை நடத்தி வருகிறார்கள்.

பர்கூர் அருகே உள்ள அங்கிநாயனப்பள்ளியை சேர்ந்தவர் திருப்பதி. இவரது மகன் பாலசந்தர் (22). கூலித்தொழிலாளி. இவர் அந்த பகுதியில் நடந்்து சாலையை கடக்க முயன்றார். அப்போது சென்னையில் இருந்து கிருஷ்ணகிரி நோக்கி வந்த கார் பாலசந்தர் மீது மோதியது. 

இதில் பலத்த காயமடைந்த அவர் கிருஷ்ணகிரி அரசு ஆஸ்பத்திரியில் சேர்க்கப்பட்டார். அங்கு தீவிர சிகிச்சை அளித்தும் பலனின்றி பாலசந்தர் பரிதாபமாக இறந்தார். இந்த விபத்து குறித்து பர்கூர் போலீசார் வழக்குப்பதிவு செய்து விசாரணை நடத்தி வருகின்றனர்.