ரசாயன கல் மூலம் பழுக்க வைத்த 1½ டன் மாம்பழம் பறிமுதல் உணவு பாதுகாப்புத்துறை அதிகாரிகள் நடவடிக்கை

திண்டுக்கல், மே.10-

திண்டுக்கல் மாவட்ட உணவு பாதுகாப்பு அலுவலர் சிவராம பாண்டியன் தலைமையில் உணவு பாதுகாப்பு அலுவலர் செல்வம் மற்றும் அதிகாரிகள் திண்டுக்கல் நகர் பகுதியில் உள்ள 5 மாம்பழ குடோன்களில் இன்று திடீர் ஆய்வு மேற்கொண்டனர். அப்போது 3 குடோன்களில் ரசாயன கல் மற்றும் ரசாயன ஸ்பிரே மூலம் மாம்பழங்கள் பழுக்க வைக்கப்பட்டிருந்தது கண்டுபிடிக்கப்பட்டது. இதையடுத்து அந்த குடோன்களில் இருந்த தலா ½ டன் வீதம் 1½ டன் மாம்பழங்களை உணவு பாதுகாப்புத்துறை அதிகாரிகள் பறிமுதல் செய்தனர். மேலும் அந்த குடோன்களின் உரிமையாளர்களுக்கு தலா ரூ.5 ஆயிரம் வீதம் ரூ.15 ஆயிரம் அபராதம் விதிக்கப்பட்டது.

இதேபோல் திண்டுக்கல்லில் உள்ள சவர்மா விற்பனை கடைகள் மற்றும் சாலையோர அசைவ உணவகங்களில் உணவுத்துறை அதிகாரிகள் சோதனை செய்தனர். அப்போது பிளாஸ்டிக் பொருட்கள் பயன்பாடு மற்றும் சுகாதாரமற்ற முறையில் உணவு தயாரித்தற்காக 9 கடைகளின் உரிமையாளர்களுக்கு தலா ரூ.2 ஆயிரம் வீதம் ரூ.18 ஆயிரம் அபராதம் விதித்தனர்.