விபத்தில் புரோட்டா மாஸ்டர் பலி

குஜிலியம்பாறை:

பெரியகுளம் அருகே உள்ள புல்லக்காபட்டியை சேர்ந்தவர் அழகர்சாமி (வயது 35). இவர் குஜிலியம்பாறையில் உள்ள ஒரு ஓட்டலில் புரோட்டா மாஸ்டராக வேலை பார்த்து வந்தார். கடந்த 10-ந்தேதி இரவு இவர் ஓட்டலில் இருந்து வெளியே நடந்து சென்றார். அப்போது அந்த வழியாக 16 வயது சிறுவன் ஓட்டி வந்த மோட்டார் சைக்கிள் அழகர்சாமி மீது பலமாக மோதியது. இதில் தூக்கி வீசப்பட்ட அவருக்கு தலையில் பலத்த காயம் ஏற்பட்டது. இதையடுத்து அவர் சிகிச்சைக்காக கரூர் அரசு மருத்துவமனைக்கு கொண்டு செல்லப்பட்டார். பின்னர் அவர் மேல் சிகிச்சைக்காக திருச்சி அரசு மருத்துவமனையில் அனுமதிக்கப்பட்டார். இந்தநிலையில் அங்கு சிகிச்சை பலனின்றி அழகர்சாமி நேற்று இரவு உயிரிழந்தார். இது குறித்து குஜிலியம்பாறை போலீசார் வழக்குப்பதிவு செய்து விசாரணை நடத்தி வருகின்றனர்.