மீனவர் வீட்டில் டி வி மிக்சி திருட்டு

கடலூர்

கடலூர் அருகே உள்ள தாழங்குடாவை சேர்ந்தவர் வீரமணி. இவரது மனைவி சோனியா. மீனவரான வீரமணி வெளிநாட்டில் வேலை பார்த்து வருகிறார். இதனால் சோனியா வீட்டில் தனியாக வசித்து வருகிறார். கடந்த 2 நாட்களுக்கு முன்பு உடல் நலம் பாதிக்கப்பட்ட சோனியா, புதுச்சேரியில் உள்ள ஓரு ஆஸ்பத்திரிக்கு சென்று, அங்கேயே தங்கியிருந்து சிகிச்சை பெற்றார். பின்னர் நேற்று காலை வீடு திரும்பினார். அப்போது வீட்டின் கதவு பூட்டு உடைக்கப்பட்டு கிடந்தது. இதை கண்டு திடுக்கிட்ட அவர் வீட்டுக்குள் சென்று பார்த்தார். அப்போது அங்கிருந்த பீரோ உடைக்கப்பட்டிருந்தது. மேலும் வீட்டில் இருந்த பொருட்கள் அனைத்தும் சிதறி கிடந்தன. மிக்சி, டி.வி. உள்ளிட்ட பொருட்களை காணவில்லை. வீட்டில் யாரும் இல்லாததை தெரிந்து கொண்ட மர்ம நபர்கள், கதவு பூட்டை உடைத்து உள்ளே புகுந்து அதனை திருடிச்சென்றது தெரியவந்தது. இதுகுறித்த புகாரின் பேரில் தேவனாம்பட்டினம் போலீசார் வழக்குப்பதிவு செய்து விசாரணை நடத்தி வருகின்றனர்.