மாடியில் இருந்து தவறி விழுந்து பெண் சாவு

அம்பை:

அம்பை சேனையர் பஜனைமட தெருவைச் சேர்ந்தவர் சங்கர சுப்பிரமணியன். இவர் அப்பகுதியில் பெட்டிக்கடை நடத்தி வருகிறார். இவருடைய மனைவி மாரிச்செல்வம் (வயது 52). இவர்களுக்கு 2 மகன்கள் உள்ளனர்.

நேற்று காலையில் மாரிச்செல்வம் தனது வீட்டின் மாடியில் துணிகளை காய போட்டு கொண்டிருந்தார். அப்போது அவருக்கு திடீரென்று தலை சுற்றியதால், மாடியில் இருந்து தவறி கீழே விழுந்தார். இதில் பலத்த காயமடைந்த அவருக்கு அம்பை அரசு ஆஸ்பத்திரியில் முதலுதவி சிகிச்சை அளித்து மேல் சிகிச்சைக்காக பாளையங்கோட்டை ஐகிரவுண்டு அரசு ஆஸ்பத்திரியில் அனுமதித்தனர்.

அங்கு அவருக்கு தீவிர சிகிச்சை அளிக்கப்பட்டது. ஆனாலும் சிகிச்சை பலனின்றி மாரிச்செல்வம் பரிதாபமாக இறந்தார். இதுகுறித்து அம்பை போலீசார் வழக்குப்பதிவு செய்து விசாரணை நடத்தி வருகின்றனர்.