கள்ளக்குறிச்சியில் டி.என்.பி.எஸ்.சி. குரூப்-2 தேர்விற்கான மாதிரி தேர்வு

கள்ளக்குறிச்சி, 

தமிழ்நாடு அரசு பணியாளர் தேர்வாணையத்தால் நடத்தப்படுகிற குரூப்-2 தேர்வு வருகிற 21-ந் தேதி நடைபெற உள்ளது. இந்த தேர்விற்காக கள்ளக்குறிச்சி மாவட்ட வேலைவாய்ப்பு மற்றும் தொழில்நெறி வழிகாட்டும் மையம் சார்பில் மாவட்ட வேலைவாய்ப்பு அலுவலகத்தில் இலவச பயிற்சி வகுப்பு நடத்தப்பட்டு வருகிறது. 

இதைத்தொடர்ந்து டி.என்.பி.எஸ்.சி. குரூப்-2 தேர்வுக்கான இலவச மாதிரி தேர்வு நேற்று கள்ளக்குறிச்சி அருகே இந்திலியில் உள்ள டாக்டர் ஆர்.கே.எஸ். கல்லூரியில் நடைபெற்றது. இதில் மொத்தம் 306 பேர் கலந்து கொண்டு தேர்வு எழுதினார்கள்.

இதேபோல், ஜூலை மாதம் நடைபெற உள்ள குரூப்-4 தேர்விற்கு இலவச பயிற்சி வகுப்புகள் மாவட்ட வேலைவாய்ப்பு மற்றும் தொழில்நெறி வழிகாட்டும் மையம் சார்பில் இந்திலியில் உள்ள டாக்டர் ஆர்.கே.எஸ். கல்லூரியில் சனி மற்றும் ஞாயிற்றுக்கிழமைகளில் தொடர்ந்து நடைபெற்று வருகிறது. இதனை கள்ளக்குறிச்சி மாவட்டத்தை சேர்ந்தவர்கள் பயன்படுத்தி கொள்ளுமாறு கள்ளக்குறிச்சி மாவட்ட வேலைவாய்ப்பு அலுவலர் முரளிதரன் கேட்டுக்கொண்டார்.