குஜராத்தில் வெள்ள பேரிடர் நிவாரண பணிகளுக்காக ரூ. 500 கோடி நிதி: பிரதமர் மோடி

புதுடெல்லி,

குஜராத்தில் இடைவிடாது பெய்து வரும் கனமழையால் பல இடங்களில் வெள்ளப்பெருக்கு ஏற்பட்டுள்ளது. குறிப்பாக வட குஜராத் பகுதியான பனஸ்காந்தா மற்றும் படன் மாவட்டங்களில் பல கிராமங்கள் வெள்ள நீரில் மிதக்கின்றன. வெள்ளப்பெருக்கில் பாதிக்கப்பட்டுள்ள  மக்களை மீட்பதற்காக ராணுவம் மற்றும் தேசிய பேரிடர் மீட்பு படையினர் ஈடுபடுத்தப்பட்டுள்ளனர். மாநிலம் முழுவதும் உஷார் நிலை பிறப்பிக்கப்பட்டுள்ளது. 

வெள்ளத்தால் கடுமையாக பாதிக்கப்பட்ட குஜராத் மாநிலத்துக்கு  சென்ற பிரதமர் மோடி, ஹெலிகாப்டர் மூலம் வெள்ளத்தால் ஏற்பட்ட சேதங்களை பார்த்தார். பின்னர், குஜராத் மாநில வெள்ள பேரிடர் நிவாரண பணிகளுக்காக மத்திய அரசு சார்பில் ரூ.500 கோடிக்கு மேல் வழங்கப்படும்  என்று அறிவித்த பிரதமர் மோடி,  வெள்ளத்தில் உயிரிழந்தவர்களின் குடும்பத்திற்கு தலா ரூ.2 லட்சம், காயமடைந்தவர்களுக்கு தலா ரூ.50 ஆயிரம் நிவாரணம்  வழங்கப்படும் எனவும் தெரிவித்தார்.