சத்தீஷ்கார், மிசோரம், மத்தியபிரதேசம், ராஜஸ்தான், தெலுங்கானா : 5 மாநில தேர்தல் தேதி அறிவிப்பு

புதுடெல்லி,

உலகின் மிகப்பெரிய ஜனநாயக நாடான இந்தியாவில் அடுத்த ஆண்டு நாடாளுமன்ற பொதுத்தேர்தல் நடக்க உள்ள நிலையில், மத்திய பிரதேசம், சத்தீஷ்கார், ராஜஸ்தான், மிசோரம் ஆகிய 4 மாநில சட்டசபைகளின் ஆயுள்காலம் விரைவில் முடிகிறது.

இந்த 4 மாநில சட்டசபை தேர்தல், அடுத்த ஆண்டு நடக்க உள்ள நாடாளுமன்ற மக்களவை தேர்தலுக்கு முன்னோடியாக ஒரு மினி பொதுத்தேர்தல் போல அமையும் என்ற எதிர்பார்ப்பு நிலவியது.

இதற்கிடையே சற்றும் எதிர்பாராத வகையில், தெலுங்கானாவில் சந்திரசேகரராவ் தலைமையிலான தெலுங் கானா ராஷ்டீர சமிதி அரசு சட்டசபையை கலைத்து திடீர் தேர்தல் நடத்த முடிவு செய்தது. அதன்படி கடந்த மாதம் அந்த மாநில சட்டசபை கலைக்கப்பட்டது.

எனவே மத்திய பிரதேசம், சத்தீஷ்கார், ராஜஸ்தான், மிசோரம் மாநிலங்களுடன், தெலுங்கானா மாநிலத்திலும் சட்டசபை தேர்தலை நடத்த தேர்தல் கமிஷன் முடிவு எடுத்தது.

இந்த நிலையில் டெல்லியில் தலைமை தேர்தல் கமிஷனர் ஓ.பி.ராவத் நேற்று நிருபர்களை சந்தித்து 5 மாநில சட்டசபை தேர்தல் தேதிகளை அறிவித்தார்.

230 இடங்களை கொண்ட மத்திய பிரதேச சட்ட சபைக்கும், 40 இடங்களைக் கொண்ட மிசோரம் சட்டசபைக்கும் அடுத்த மாதம் (நவம்பர்) 28-ந் தேதி ஒரே நாளில் ஓட்டுப்பதிவு நடக்கிறது.

200 இடங்களைக் கொண்ட ராஜஸ்தான் சட்டசபைக்கும், 119 இடங்களைக் கொண்ட தெலுங்கானா சட்டசபைக்கும் ஒரே கட்டமாக டிசம்பர் மாதம் 7-ந் தேதி தேர்தல் நடத்தப்படும்.

90 இடங்களைக் கொண்ட சத்தீஷ்கார் சட்டசபைக்கு அடுத்த மாதம் (நவம்பர்) 12-ந் தேதி மற்றும் 20-ந் தேதி என 2 கட்டங்களாக தேர்தல் நடத்தப்படுகிறது.

மத்திய பிரதேசம், மிசோரம் ஆகிய 2 மாநிலங்களிலும் வேட்புமனு தாக்கல் அடுத்த மாதம் (நவம்பர்) 2-ந் தேதியும், ராஜஸ்தான், தெலுங்கானா ஆகிய 2 மாநிலங்களிலும் அடுத்த மாதம் (நவம்பர்) 12-ந் தேதியும் தொடங்குகிறது.

சத்தீஷ்கார் மாநிலத்தில் முதல் கட்ட தேர்தலுக்கு வேட்புமனு தாக்கல் வரும் 16-ந் தேதியும், 2-ம் கட்ட தேர்தலுக்கு வேட்புமனு தாக்கல் வரும் 26-ந் தேதியும் தொடங்குகிறது.

மத்திய பிரதேசம், சத்தீஷ்கார், ராஜஸ்தான், மிசோரம், தெலுங்கானா ஆகிய 5 மாநில சட்டசபை தேர்தல்களிலும் பதிவாகிற ஓட்டுகள் ஒரே நாளில், டிசம்பர் மாதம் 11-ந் தேதி எண்ணி முடிவு அறிவிக்கப்படும்.

இந்த 5 மாநிலங்களில் மத்திய பிரதேசம், சத்தீஷ்கார், ராஜஸ்தான், மிசோரம் ஆகிய 4 மாநிலங்களிலும் நேற்றும், தெலுங்கானாவில் சட்டசபை கலைக்கப்பட்டதைத் தொடர்ந்தும் தேர்தல் நடத்தை விதிகள் நடைமுறைக்கு வந்து விட்டதாகவும் தலைமை தேர்தல் கமிஷனர் ஓ.பி.ராவத் கூறினார்.

இந்த மாநிலங்களில் எந்த நலத்திட்டங்களையும், சிறப்பு அறிவிப்புகளையும் தேர்தல் கமிஷனின் அனுமதி இல்லாமல் மாநில அரசுகள் வெளியிட முடியாது என்பது குறிப்பிடத்தக்கது.

தமிழ்நாட்டில் திருப்பரங்குன்றம் தொகுதி அ.தி.மு.க. எம்.எல்.ஏ., ஏ.கே.போஸ், கடந்த ஆகஸ்டு மாதம் 2-ந் தேதி உடல்நலக்குறைவால் மரணம் அடைந்தார்.

இதே போன்று திருவாரூர் தொகுதியில் இருந்து தமிழக சட்டசபைக்கு தேர்ந்தெடுக்கப்பட்டிருந்த தி.மு.க தலைவர் கருணாநிதி கடந்த ஆகஸ்டு மாதம் 7-ந் தேதி உடல் நலக்குறைவால் காலமானார்.

இவ்விரு தொகுதிகளும் காலியாக உள்ளன.

இந்த தொகுதிகளுக்கும் 5 மாநில சட்டசபை தேர்தலுடன் இடைத்தேர்தல் அறிவிக்கப்படும் என்ற பெருத்த எதிர்பார்ப்பு நிலவியது. ஆனால் இவ்விரு தொகுதிகளுக்கும் இடைத்தேர்தல் அறிவிக்கப்படவில்லை.

இது குறித்து நிருபர்கள் கேள்வி எழுப்பியபோது, “தமிழகத்தில் மழைக்காலம் தொடங்குவதால் தேர்தல் தேதியை அறிவிக்க வேண்டாம் என்று தமிழக அரசின் தலைமைச் செயலாளர் கேட்டுக்கொண்டுள்ளதால் தேர்தல் தேதி அறிவிக்கப்படவில்லை, மற்றொரு நாளில் இது அறிவிக்கப்படும்” என தலைமை தேர்தல் கமிஷனர் ஓ.பி.ராவத் கூறினார்.

திருப்பரங்குன்றம் தொகுதியைப் பொறுத்தமட்டில், கடந்த இடைத்தேர்தல் தொடர்பாக தி.மு.க. வேட்பாளர் டாக்டர் சரவணன் தொடர்ந்த வழக்கு நிலுவையில் இருப்பதாலும், தற்போது அங்கு இடைத்தேர்தல் அறிவிக்கப்படவில்லை என்றும் அவர் தெரிவித்தார்.

இது தமிழக அரசியல் கட்சிகளுக்கு ஏமாற்றத்தை அளித்துள்ளது.

அடுத்த ஆண்டு நடக்கவுள்ள நாடாளுமன்ற மக்களவை தேர்தல் முடிவுக்கு அச்சாரமாக அமையும் என்ற எதிர்பார்ப்பு உள்ளதால் 5 மாநில சட்டசபை தேர்தல் முடிவுகள் முக்கியத்துவம் பெறுகின்றன.

மத்திய பிரதேசத்தில் பாரதீய ஜனதா கட்சி ஆட்சி 2003-ம் ஆண்டு முதல் தொடர்ந்து 15 ஆண்டுகளாக நடைபெறுகிறது. சிவராஜ் சவுகான் தொடர்ந்து இரு முறை முதல்-மந்திரி பதவி வகித்து வருகிறார். இங்கு ஆட்சியை தக்க வைக்க பாரதீய ஜனதா கட்சியும், ஆட்சியைப் பிடிக்க காங்கிரசும் கடுமையாக முயற்சிக்கும்.

சத்தீஷ்காரில் 2003-ம் ஆண்டு முதல் தொடர்ந்து 15 ஆண்டுகளாக ராமன்சிங் தலைமையில் பாரதீய ஜனதா கட்சி ஆட்சி நடக்கிறது. இங்கும் பாரதீய ஜனதா கட்சிக்கும், காங்கிரசுக்கும் இடையே பலத்த போட்டி நிலவுகிறது. முன்னாள் காங்கிரஸ் முதல்-மந்திரி அஜித் ஜோகி, சத்தீஷ்கார் ஜனதா காங்கிரஸ் என்ற பெயரில் தனிக்கட்சி தொடங்கி களம் காண்கிறார்.

ராஜஸ்தான் மாநிலத்தில் கடந்த 5 ஆண்டுகளாக வசுந்தரா ராஜே சிந்தியா தலைமையில் பாரதீய ஜனதா கட்சி ஆட்சி நடக்கிறது. அங்கு ஏறத்தாழ 25 ஆண்டுகளாக பாரதீய ஜனதா கட்சியும், காங்கிரசும் மாறி மாறி ஆட்சிக்கு வந்துள்ளன.

மிசோரமில் லால் தன்ஹாவ்லா தலைமையில் காங்கிரஸ் ஆட்சி நடக்கிறது. இங்கு காங்கிரசும், மிசோ தேசிய முன்னணியும் மாறி மாறி ஆட்சிக்கு வந்துள்ளன.