72-வது பிறந்த நாள்: சோனியாவுக்கு மோடி வாழ்த்து

புதுடெல்லி,

ஐக்கிய முற்போக்கு கூட்டணியின் தலைவரும், காங்கிரஸ் கட்சியின் மூத்த தலைவருமான சோனியா காந்தி 1946-ம் ஆண்டு, டிசம்பர் 9-ந் தேதி இத்தாலியில் பிறந்தவர். அவர் தனது 72-வது பிறந்த நாளை டெல்லியில் நேற்று சிறப்பாக கொண்டாடினார்.

அவருக்கு பிரதமர் நரேந்திர மோடி வாழ்த்து தெரிவித்தார். இது தொடர்பாக அவர் டுவிட்டரில் வெளியிட்ட பதிவில், “திருமதி சோனியா காந்திக்கு பிறந்த நாள் நல்வாழ்த்துக்கள். அவர் நீண்ட ஆயுளுடன், ஆரோக்கியமாக வாழ இறைவனிடம் வேண்டுகிறேன்” என குறிப்பிட்டுள்ளார்.

இதேபோன்று திரிணாமுல் காங்கிரஸ் கட்சியின் தலைவரும், மேற்கு வங்காள மாநில முதல்-மந்திரியுமான மம்தா பானர்ஜியும் சோனியா காந்திக்கு பிறந்த நாள் வாழ்த்து தெரிவித்துள்ளார்.