டி.கே.சிவகுமார் கைது விவகாரம்: அடிபணிய மாட்டோம், தொடர்ந்து கேள்வி எழுப்புவோம் - காங்கிரஸ் சொல்கிறது

புதுடெல்லி,

கர்நாடக முன்னாள் மந்திரி டி.கே.சிவகுமாரை அமலாக்கத்துறை கைது செய்துள்ளது. இதுதொடர்பாக காங்கிரஸ் செய்தித்தொடர்பாளர் மணீ‌‌ஷ் திவாரி நிருபர்களிடம் கூறியதாவது:-

நீடித்து வரும் அரசியல் பழிவாங்கலின் சமீபத்திய உதாரணம்தான், டி.கே.சிவகுமார் கைது சம்பவம். அவர் செய்த ஒரே குற்றம், குஜராத்தில் நடந்த மாநிலங்களவை தேர்தலின்போது, அம்மாநிலத்தை சேர்ந்த காங்கிரஸ் எம்.எல்.ஏ.க்களை பாதுகாத்தது மட்டும்தான். மோடியின் 2-வது ஆட்சிக்காலத்தின் 96 நாட்களை ‘கொடுங்கோன்மை, குழப்பம், அராஜகம்’ என்ற வார்த்தைகளால் வகைப்படுத்தலாம்.

இத்தகைய அரசியல் துன்புறுத்தல்களுக்கு காங்கிரஸ் அடிபணியாது. தொடர்ந்து கடினமான கேள்விகளை எழுப்புவோம், அதற்கு பதில் கோருவோம். அச்சுறுத்தல்களால் ஜனநாயகத்தின் குரல்வளை நெரிக்கப்படுவதை அனுமதிக்கமாட்டோம். இவ்வாறு அவர் கூறினார்.