நாடாளுமன்றம், 5 மாநில சட்டமன்ற தேர்தலில் காங்கிரஸ் வசூலித்தது ரூ.856 கோடி; செலவழித்தது ரூ.820 கோடி

புதுடெல்லி,

கடந்த மார்ச் மாதம் 10-ந் தேதி நாடாளுமன்றத்துக்கும், ஆந்திரா, அருணாசலபிரதேசம், தெலுங்கானா, ஒடிசா, சிக்கிம் ஆகிய 5 மாநில சட்டமன்றங்களுக்கும் தேர்தல் அறிவிக்கப்பட்டது. இந்த தேர்தலில் செய்யப்பட்ட செலவு கணக்கு விவரங்களை காங்கிரஸ் பொருளாளர் அகமது பட்டேல் தேர்தல் கமிஷனில் தாக்கல் செய்துள்ளார். அதில் கூறப்பட்டுள்ளதாவது:-

இந்த தேர்தல் காலத்தில் காங்கிரஸ் கட்சி மொத்தம் ரூ.856.2 கோடி நிதி திரட்டியது. இதில் பிரசாரத்துக்காக ரூ.820.9 கோடி செலவழித்தது. கட்சியின் பொது பிரசாரத்துக்கு ரூ.626.36 கோடியும், வேட்பாளர்களுக்காக ரூ.194 கோடியும் செலவழிக்கப்பட்டது.

இந்த தேர்தலுக்கு பின்னர் கட்சியின் நிதியாக ரூ.315.88 கோடி உள்ளது. இதில் ரூ.265 கோடி வங்கி கணக்கிலும், ரூ.50 கோடி கையிருப்பு பணமாகவும் உள்ளது.

இவ்வாறு அதில் கூறப்பட்டுள்ளது. 2014 நாடாளுமன்ற தேர்தலில் காங்கிரஸ் ரூ.316 கோடி செலவழித்தது குறிப்பிடத்தக்கது. ஆளும் பா.ஜனதா கட்சி இன்னும் தனது செலவு கணக்கை தேர்தல் கமிஷனில் தாக்கல் செய்யவில்லை.