தேசிய செய்திகள்

இந்தியாவில் 471 பேருக்கு கொரோனா வைரஸ் பாதிப்பு: 20 மாநிலங்களில் முழுமையான தடை அமல் + "||" + 471 people infected with coronavirus in India: Complete ban in 20 states

இந்தியாவில் 471 பேருக்கு கொரோனா வைரஸ் பாதிப்பு: 20 மாநிலங்களில் முழுமையான தடை அமல்

இந்தியாவில் 471 பேருக்கு கொரோனா வைரஸ் பாதிப்பு: 20 மாநிலங்களில் முழுமையான தடை அமல்
இந்தியாவில் 471 பேருக்கு கொரோனா வைரஸ் பாதிப்பு உறுதியாகி உள்ளதாகவும், 9 பேர் பலியாகி உள்ளதாகவும் மத்திய சுகாதார அமைச்சகம் கூறியுள்ளது. நாடு முழுவதும் 20 மாநிலங்களில் முழுமையான தடை உத்தரவு அமல்படுத்தப்பட்டுள்ளது.
புதுடெல்லி,

உலகம் முழுவதும் கொரோனா வைரஸ் பாதிப்பால் உயிரிழந்தவர்களின் எண்ணிக்கை 14,500-ஐ தாண்டிவிட்டது. இந்தியாவிலும் கொரோனா வைரஸ் பரவுவது அதிகரித்து வருவதால் அதனை கட்டுப்படுத்தும் வகையில் நேற்றுமுன்தினம் மக்கள் ஊரடங்கு கடைபிடிக்கப்பட்டது.


இந்திய மருத்துவ ஆராய்ச்சி கவுன்சில் கூறியதாவது:-

நாடு முழுவதும் நேற்று காலை 10 மணி வரை 13,383 பேரின் ரத்தமாதிரி சோதனை செய்யப்பட்டுள்ளது. இதில் மராட்டியத்தில் 3 வெளிநாட்டினர் உள்பட 67 பேருக்கும், கேரளாவில் 7 வெளிநாட்டினர் உள்பட 67 பேருக்கும், டெல்லியில் ஒரு வெளிநாட்டுக்காரர் உள்பட 29 பேருக்கும், உத்தரபிரதேசத்தில் 28, ராஜஸ்தானில் 27, தெலுங்கானாவில் 26 (11 வெளிநாட்டினர்), கர்நாடகாவில் 26 பேருக்கும் இந்த வைரஸ் பாதிப்பு உள்ளது.

இதுதவிர தமிழ்நாடு, அரியானா, பஞ்சாப், குஜராத், மேற்குவங்காளம், ஆந்திரா, உத்தரகாண்ட் உள்பட நாடு முழுவதும் பரவலாக புதிய நோயாளிகள் கண்டுபிடிக்கப்பட்டுள்ளனர். இதனால் இந்தியாவில் கொரோனா வைரஸ் தாக்குதல் உறுதியானவர்களின் எண்ணிக்கை 415 ஆக அதிகரித்துள்ளது. இவர்களில் 41 பேர் வெளிநாடுகளை சேர்ந்தவர்கள். இதில் 24 பேர் சிகிச்சையில் குணமடைந்து வீடு திரும்பிவிட்டனர். 7 பேர் பலியாகி உள்ளனர்.

இவ்வாறு மருத்துவ கவுன்சில் கூறியிருந்தது.

இதற்கிடையே மேற்குவங்காள மாநிலம் கொல்கத்தாவில் 57 வயதுள்ள ஒருவரும், இமாச்சலபிரதேசத்தில் ஒருவரும் கொரோனா வைரஸ் தாக்குதலுக்கு பலியானார்கள். இதனால் பலி எண்ணிக்கை 9 ஆக உயர்ந்தது.

இதேபோல மேலும் பல மாநிலங்களில் கொரோனா வைரஸ் தாக்குதலுக்கு உள்ளான புதிய நோயாளிகள் கண்டுபிடிக்கப்பட்டனர். இதனால் இந்தியாவில் பாதிக்கப்பட்டோர் எண்ணிக்கை நேற்று இரவில் 471 ஆக அதிகரித்தது.

இதுவரை பார்த்திராத இந்த வைரஸ் தாக்குதல் காரணமாக மத்திய, மாநில அரசுகள் மிகவும் தீவிரமான நடவடிக்கைகளை எடுக்கவும், கடுமையான கட்டுப்பாடுகளை விதிக்கவும் முடிவு செய்துள்ளன.

டெல்லி, பஞ்சாப், ஜார்கண்ட், நாகலாந்து, கேரளா உள்பட 20 மாநிலங்களில் முழுமையான தடை விதிக்கப்பட்டுள்ளது. மராட்டியம், ராஜஸ்தான், உத்தரகாண்ட் உள்பட பல மாநிலங்கள் ஏற்கனவே மாநிலத்தின் ஒரு பகுதிக்கு தடை விதித்துள்ளது. பீகார், அரியானா, உத்தரபிரதேசம், மேற்கு வங்காளம் ஆகிய மாநிலங்களில் பல மாவட்டங்களுக்கு இதுபோன்ற தடை விதிக்கப்பட்டுள்ளது. 20 மாநிலங்களில் முழுமையான தடையும், 6 மாநிலங்களில் பகுதியளவு தடையும் அமல்படுத்தப்பட்டுள்ளதாக மத்திய அரசு அதிகாரி ஒருவர் கூறினார்.

மத்திய மந்திரிசபை செயலாளர் ராஜீவ் கவுபா மாநில தலைமை செயலாளர்களுக்கு ஒரு கடிதம் அனுப்பியுள்ளார். அதில், “சூழ்நிலையை 24 மணி நேரமும் கண்காணிக்க வேண்டும். தேவைப்பட்டால் கூடுதல் கட்டுப்பாடுகளை விதிக்கலாம் என்றும் கட்டுப்பாடுகளை கடுமையாக அமல்படுத்த வேண்டும்” என்றும் கூறியுள்ளார்.

மத்திய அரசு டெல்லி, பெங்களூரு, மும்பை, சென்னை, காஞ்சீபுரம், ஈரோடு உள்பட நாடு முழுவதும் 80 மாவட்டங்களை தனிமைப்படுத்த பரிந்துரைத்துள்ளது. இந்த 80 மாவட்டங்களிலும் வசிப்பவர்கள் பயணம் செய்யவும், நடமாடவும் கடும் கட்டுப்பாடுகள் விதிக்கப்பட்டுள்ளது. அனைத்து பயணிகள் ரெயில்கள், மாநிலங்களுக்கு இடையே செல்லும் பஸ் போக்குவரத்து ஆகியவை 31-ந் தேதி வரை ரத்து செய்யப்பட்டுள்ளன.

அறிவிக்கப்பட்ட இந்த பகுதிகளில் கடுமையான தடைகளை விதிக்கவும், இந்த உத்தரவுகளை மீறுவோர் மீது சட்டப்பூர்வமான நடவடிக்கை எடுக்கவும் மாநில அரசுகள் கேட்டுக்கொள்ளப்பட்டுள்ளதாக மத்திய பத்திரிகை தகவல் துறை தெரிவித்துள்ளது.

பீகார் மாநிலம் பாட்னா குர்ஜி பகுதியில் உள்ள ஒரு மசூதியில் வெளிநாட்டினர் இருப்பதாக சிலர் போலீசுக்கு தகவல் தெரிவித்தனர். போலீசார் விரைந்து சென்று கிர்கிஸ்தான் நாட்டை சேர்ந்த 10 பேரையும், அவர்களின் வழிகாட்டியாக செயல்பட்ட உத்தரபிரதேசத்தை சேர்ந்த 2 பேரையும் போலீசார் பிடித்து ரத்த பரிசோதனைக்காக ஆஸ்பத்திரிக்கு அனுப்பிவைத்தனர்.

உரிய விசா வைத்துள்ள அவர்கள் 10 பேரும் மதபோதகர்கள் என தெரியவந்தது. 12 பேருக்கும் சோதனை செய்ததில் 6 பேருக்கு கொரோனா பாதிப்பு இல்லை என தெரிந்ததும் விடுவிக்கப்பட்டனர். மற்ற 6 பேரின் முடிவு இன்னும் வரவில்லை. அதுவரை ஓட்டலில் தனிமையில் தங்கியிருக்க உத்தரவிடப்பட்டுள்ளனர்.

டெல்லி எய்ம்ஸ் மருத்துவமனை புறநோயாளிகளுக்கு சிகிச்சை அளிப்பதை நிறுத்திவைக்க முடிவு செய்துள்ளது. அதேபோல சிறப்பு சிகிச்சைகள், அனைத்து புதிய நோயாளிகள் மற்றும் தொடர் சிகிச்சை பெறுவோருக்கும் சிகிச்சைகளை இன்று (செவ்வாய்க்கிழமை) முதல் அடுத்த உத்தரவு வரும் வரை நிறுத்திவைக்கிறது.

கடந்த வாரம் எய்ம்ஸ், அவசர உயிர்காக்கும் அறுவை சிகிச்சைகள் தவிர, அத்தியாவசியமற்ற அறுவை சிகிச்சைகளை தள்ளிவைத்தது குறிப்பிடத்தக்கது. கொரோனா வைரஸ் பாதிக்கப்பட்ட நோயாளிகளுக்கு சிகிச்சை அளிப்பதற்கு முக்கியத்துவம் அளிக்கப்படுகிறது.


தொடர்புடைய செய்திகள்

1. இந்தியாவில் கொரோனா வைரஸ் பாதித்தோர் எண்ணிக்கை 4 நாளில் இரு மடங்கானது
இந்தியாவில் கொரோனா வைரசால் பாதித்தவர்கள் எண்ணிக்கை 4 நாளில் இரு மடங்காக உயர்ந்தது.
2. இந்தியாவில் ‘கொரோனாவுக்கு எதிராக நீண்ட போர் தொடங்கி இருக்கிறது’ - பிரதமர் மோடி பேச்சு
இந்தியாவில் கொரோனாவுக்கு எதிராக நீண்ட போர் தொடங்கி இருப்பதாக பிரதமர் மோடி கூறினார்.
3. இந்தியாவில் கொரோனா பாதிப்பு 4 ஆயிரத்தை தாண்டியது
இந்தியாவில் கொரோனா பாதித்தவர்கள் எண்ணிக்கை 4,067 ஆக உயர்ந்துள்ளது.
4. இந்தியாவில் கொரோனா தாக்குதலுக்கு ஆளானவர்களில் 83 சதவீதம் பேர், 60 வயதுக்கு உட்பட்டவர்கள்தான் - அதிரவைக்கும் புள்ளி விவரங்கள்
இந்தியாவில் கொரோனா வைரஸ் தாக்குதலுக்கு ஆளானவர்களில் 83 சதவீதம்பேர், 60 வயதுக்கு குறைந்தவர்கள்தான் என்ற அதிர்ச்சியூட்டும் புள்ளிவிவரம் வெளியாகி இருக்கிறது.
5. இந்தியாவில் 15-ந் தேதி முதல் மீண்டும் ரெயில் சேவை: தயாராக இருக்குமாறு அனைத்து மண்டலங்களுக்கும் அறிவுறுத்தல்
இந்தியாவில் வருகிற 15-ந்தேதி முதல் மீண்டும் ரெயில் சேவைகளை தொடங்க தயாராக இருக்குமாறு அனைத்து மண்டலங்களுக்கும் ரெயில்வே நிர்வாகம் அறிவுறுத்தி உள்ளது.