மும்பையில் நடிகர் அமிதாப் பச்சன் வீட்டுக்கு போலீஸ் பாதுகாப்பு அதிகரிப்பு

மும்பை,

நாட்டில் நிலவும் அரசியல் மற்றும் பொருளாதார சூழ்நிலை குறித்து திரைத்துறை மற்றும் விளையாட்டுத்துறை பிரபலங்கள் சமீப காலமாக அதிக அளவில் கருத்து தெரிவித்து வருகின்றனர். அண்மையில் நாட்டின் இறையாண்மை குறித்து சச்சின் டெண்டுல்கர், அக்‌ஷய் குமார் உள்ளிட்ட நட்சத்திரங்கள் கருத்து தெரிவித்தது பரபரப்பாக பேசப்பட்டது.

இந்த நிலையில் பெட்ரோல், டீசல் விலை உயர்வை கண்டிக்காவிட்டால் நடிகர்கள் அமிதாப் பச்சன், அக்சய் குமாரின் படங்களை மராட்டியத்தில் திரையிட விட மாட்டோம் என அந்த மாநிலத்தின் காங்கிரஸ் தலைவர் நானா படோலே எச்சரித்து இருந்தார். இந்தநிலையில் நேற்று மும்பை ஜூகுவில் உள்ள அமிதாப் பச்சனின் ஜல்சா பங்களா வீட்டின் முன் போலீஸ் பாதுகாப்பு அதிகரிக்கப்பட்டது.

இதுகுறித்து போலீஸ் அதிகாரி ஒருவர் கூறுகையில், "முன்எச்சரிக்கை நடவடிக்கையாக எடுக்கப்பட்டுள்ள தற்காலிக நடவடிக்கை தான் இது " என்றார்.