டெல்லியில் ஊரடங்கு தளர்வாக தொழிற்சாலைகள் மற்றும் கட்டிட பணிகளுக்கு அனுமதி

புதுடெல்லி,

டெல்லியில் கடந்த மாதம் 20ஆம் தேதி கொரோனா பாதிப்பு உச்சத்தில் இருந்தது. 29 ஆயிரம் பேர் அதிகபட்சமாக பாதிக்கப்பட்டனர். 300க்கும் மேற்பட்டோர் உயிரிழந்தனர்.

இதையடுத்து, தீவிரமான, தளர்வுகள் அற்ற ஊரடங்கை முதல்-மந்திரி அரவிந்த் கெஜ்ரிவால் அறிவித்தார். ஏறக்குறைய ஒரு மாதத்துக்கும் மேல் ஊரடங்கு நடைமுறையில் இருந்த நிலையில், அங்கு கரோனா பாசிட்டிவ் 1.5 சதவீதத்துக்கும் கீழாகச் சரிந்தது. தினசரி பாதிப்பு 1,100 ஆகச் சரிந்தது. கடந்த 24 மணி நேரத்தில் ஏறத்தாழ 900-பேருக்கு தொற்று உறுதி செய்யப்பட்டுள்ளதாக முதல் மந்திரி கெஜ்ரிவால் தெரிவித்தார். 

இதையடுத்து டெல்லியில் அன்-லாக், அதாவது ஊரடங்கைப் படிப்படியாகத் தளர்த்தும் பணியை டெல்லி அரசு தொடங்கியுள்ளது.

டெல்லியில் முதற்கட்ட ஊரடங்கு தளர்வாக தொழிற்சாலைகள் மற்றும் கட்டிட பணிகளுக்கு வரும் 31-ம் தேதி முதல் அனுமதி அளிக்கப்பட்டுள்ளது. இதன் மூலம் புலம்பெயர்ந்த தொழிலாளர்கள், தினசரி தொழிலாளர்கள் இதன் மூலம் பயனடைவார்கள் என டெல்லி முதல்-மந்திரி அரவிந்த் கெஜ்ரிவால் தெரிவித்துள்ளார். தளர்வுகள் அறிவிக்கப்பட்டதால் புலம்பெயர்ந்த தொழிலாளர்கள் வேலைக்காக டெல்லியை நோக்கி வருகிறார்கள்.