டெல்டா பிளஸ் கொரோனா தொற்று: தடுப்பூசி பலன் குறித்து 10 நாளில் அறிவிப்பு வெளியீடு - மத்திய சுகாதார அமைச்சகம் தகவல்


டெல்டா பிளஸ் கொரோனா தொற்று:  தடுப்பூசி பலன் குறித்து 10 நாளில் அறிவிப்பு வெளியீடு - மத்திய சுகாதார அமைச்சகம் தகவல்
x
தினத்தந்தி 27 Jun 2021 11:41 AM GMT (Updated: 2021-06-27T17:11:09+05:30)

டெல்டா பிளஸ் கொரோனா தொற்றுக்கு எதிராக தடுப்பூசி செயல்படுகிறதா? என்பது பற்றிய ஆய்வு முடிவு 10 நாளில் வெளிவரும் என மத்திய சுகாதார அமைச்சகம் தெரிவித்துள்ளது.





புதுடெல்லி,

இந்தியாவில் கடந்த ஆண்டில் ஏற்பட்ட கொரோனா பாதிப்பின் முதல் அலையை விட 2வது அலையில் கடும் விளைவுகள் ஏற்பட்டன.  இதன் தொடர்ச்சியாக, பல்வேறு பூஞ்சை நோய் பாதிப்புகளும் ஏற்பட தொடங்கின.  நாடு அதிக பாதிப்புகள் மற்றும் உயிரிழப்புகளையும் சந்தித்தது.

நாட்டில் கொரோனா வைரசானது உருமாறிய வகையில் பல்வேறு வடிவங்களை எடுத்து வருகிறது என நிபுணர்கள் கூறி வருகின்றனர்.  இந்நிலையில், இந்தியாவில் கண்டறியப்பட்ட டெல்டா வகை கொரோனா, 2வது அலையில் அதிக பாதிப்புகளை ஏற்படுத்தியது.

இந்த நிலையில் திடீரென ஒரு சில நாடுகளில் டெல்டா பிளஸ் என்ற உருமாறிய கொரோனா வகை பரவி வருகிறது.  மராட்டியம், மத்திய பிரதேசம், கேரளா மற்றும் தமிழகம் உள்ளிட்ட பல மாநிலங்களில் அதன் பாதிப்புகள் கண்டறியப்பட்டு உள்ளன.

இதுபற்றி இந்திய மருத்துவ ஆராய்ச்சி கவுன்சில் (ஐ.சி.எம்.ஆர்.) தொற்றியல் தலைவரான மருத்துவர் சமீரன் பண்டா கூறும்போது, நாட்டில் கொரோனா 2வது அலை போன்று 3வது அலை மிக கடுமையாக இருக்காது என கூறினார்.

கூடுதலான கொரோனா தடுப்பூசிகள் மற்றும் முறையான கொரோனா அணுகுமுறைகள் ஆகியவை இந்த அலைகளை தடுப்பதில் முக்கிய பங்கு வகிக்கும்.  டெல்டா பிளஸ் கொரோனா வகை மீது தடுப்பூசியின் விளைவு பற்றிய ஆய்வு நடந்து வருகிறது.

இதுவரை 10 மாநிலங்களில் 49 டெல்டா பிளஸ் கொரோனா பாதிப்புகள் பதிவாகியுள்ளன.  இது, 3வது அலை தொடங்கி விட்டதற்கு அடையாளம் இல்லை.  இதனை 3வது அலை என கூறுவது தவறான வழிகாட்டுதல் ஆகும் என அவர் கூறியுள்ளார்.

இந்நிலையில், டெல்டா பிளஸ் கொரோனா தொற்றுக்கு எதிராக தடுப்பூசி செயல்படுகிறதா? என்பது பற்றிய ஆய்வு, மத்திய அரசால் மேற்கொள்ளப்பட்டு வருகிறது.  முதற்கட்ட முடிவில் 2 தடுப்பூசிகளும் டெல்டா பிளஸ் தொற்றுக்கு எதிராக செயல்படுவதாக கூறப்படுகிறது.  இதுதொடர்பாக 7 முதல் 10 நாட்களுக்குள் தெரிவிக்கப்படும் என்று மத்திய சுகாதார அமைச்சகம் தெரிவித்துள்ளது.


Next Story