கொரோனா பாதிப்பு: டெல்லியில் இன்று உயிரிழப்பு இல்லை

புதுடெல்லி,

இந்தியாவில் கோர தாண்டவம் ஆடிய கொரோனா வைரசின் 2-வது அலை தற்போது கணிசமாக கட்டுக்குள் வந்துள்ளது. கேரளா, மராட்டியம் உள்ளிட்ட சில மாநிலங்களை தவிர  பிற மாநிலங்களில் கொரோனா தொற்று பரவல் கட்டுக்குள் வந்துள்ளது.  குறிப்பாக தலைநகர் டெல்லியில் தொற்று பாதிப்பு கடந்த சில வாரங்களாக இரட்டை இலக்க எண்களிலேயே பதிவாகி வருகிறது. அந்த வகையில், இன்று 51 பேருக்கு கொரோனா தொற்று உறுதி செய்யப்பட்டுள்ளது.  

தொற்று பாதிப்பில் இருந்து இன்று 80- பேர் குணம் அடைந்துள்ளனர். நிம்மதி அளிக்கும் வகையில் தொற்று பாதிப்பால் இன்று உயிரிழப்பு எதுவும் பதிவாகவில்லை. கொரோனா தொற்றுடன் சிகிச்சை பெறுபவர்கள் எண்ணிக்கை 592- ஆக குறைந்துள்ளது.  டெல்லியில் இதுவரை கொரோனா தொற்றில் இருந்து குணம் அடைந்தவர்கள் எண்ணிக்கை 14 லட்சத்து 09 ஆயிரத்து 910- ஆக உள்ளது. அதேபோல், தொற்று பாதிப்பால் இதுவரை ஏற்பட்ட உயிரிழப்பு எண்ணிக்கை 25,027- ஆக உள்ளது.