<
இந்தியாவின் ஆயுத ஏற்றுமதி ரூ.38 ஆயிரம் கோடியை தாண்டியுள்ளது: ராஜ்நாத் சிங்
இந்தியா கடந்த 7 ஆண்டுகளில் ரூ.38 ஆயிரம் கோடிக்கு அதிகமான ஆயுதங்களை ஏற்றுமதி செய்துள்ளது. விரைவிலேயே முழுமையான ஆயுத ஏற்றுமதி நாடாக மாறுவோம் என்று ராணுவ மந்திரி ராஜ்நாத் சிங் கூறியுள்ளார்.
இந்திய பாதுகாப்புத் துறை உற்பத்தியாளர்கள் சங்கத்தின் சிறு, குறு, நடுத்தர தொழில்துறை மாநாட்டில் ராணுவ மந்திரி ராஜ்நாத் சிங் நேற்று பேசினார்.
அப்போது அவர் கூறியதாவது:-
பாதுகாப்பு தொழில்துறையில் சிறு நிறுவனங்கள்
மத்திய அரசின் முயற்சியால் சுமார் 12 ஆயிரம் சிறு, குறு, நடுத்தர நிறுவனங்கள் பாதுகாப்பு தொழில்துறையில் இணைந்துள்ளன.
இந்த நிறுவனங்கள் ஆராய்ச்சி மற்றும் மேம்பாட்டில் மேலும் அதிக முதலீடு செய்ய வேண்டும். அது நாட்டின் பாதுகாப்பை வலுப்படுத்த உதவும்.
நீங்கள் புதிய தொழில்நுட்பங்கள், புதிய தயாரிப்புகளை கொண்டுவர வேண்டும். நாம் சிறிய நிறுவனம் என்பதால் நம்மால் புதிய கண்டுபிடிப்புகளை நிகழ்த்த முடியாது என்று கருதக்கூடாது.
70 நாடுகளுக்கு ஆயுத ஏற்றுமதி
நம் நாட்டின் வானவியல் மற்றும் பாதுகாப்பு தொழில்துறையின் மதிப்பு ரூ.85 ஆயிரம் கோடியாக உள்ளது. இதில் தனியார் துறையின் பங்களிப்பு ரூ.18 ஆயிரம் கோடியாக உயர்ந்துள்ளது.
மத்திய அரசு எடுத்த நடவடிக்கைகளால் கடந்த 7 ஆண்டுகளில் இந்தியாவின் ஆயுத ஏற்றுமதி ரூ.38 ஆயிரம் கோடியை தாண்டியுள்ளது. தற்போது சுமார் 70 நாடுகளுக்கு இந்தியாவில் இருந்து ஆயுத தளவாடங்கள் ஏற்றுமதி செய்யப்படுகின்றன. ஆயுத ஏற்றுமதியில் இந்தியா உலகின் முதல் 25 நாடுகளில் ஒன்றாக உள்ளது.
ரூ.35 ஆயிரம் கோடிக்கு இலக்கு
வருகிற 2024-25-ம் ஆண்டளவில் நம் நாட்டில் இருந்து ரூ.35 ஆயிரம் கோடிக்கு ஆயுதங்கள் ஏற்றுமதி செய்ய இலக்கு நிர்ணயிக்கப்பட்டுள்ளது. முழுமையான ஆயுத இறக்குமதி நாடு என்ற நிலையில் இருந்து, முழுமையான ஆயுத ஏற்றுமதி நாடு என்ற நிலையை நாம் விரைவில் அடைவோம்.
பாதுகாப்பு துறையில் சுயசார்புக்கு இந்திய ஆயுதப் படைகள் முழுமையான ஆதரவை வழங்கி வருகின்றன. இதனால் இத்துறையில் உள்நாட்டு நிறுவனங்களுக்கு வழங்கப்படும் ஒப்பந்தங்கள் அதிகரித்துள்ளன.
இவ்வாறு அவர் பேசினார்.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
