பஞ்சாபை காங். அழித்துவிடுவார்கள்; ஆம் ஆத்மியால் மட்டுமே காப்பாற்ற முடியும் - கெஜ்ரிவால்

சண்டிகர்,

117 தொகுதிகளை கொண்ட பஞ்சாப் மாநிலத்தில் சட்டசபை தேர்தல் வரும் மார்ச் மாதம் நடைபெற உள்ளது. தேர்தலுக்கு இன்னும் சில மாதங்களே உள்ள நிலையில் அம்மாநிலத்தில் அரசியல் களம் சூடுபிடிக்கத்தொடங்கியுள்ளது. 

பஞ்சாபில் காங்கிரஸ் ஆட்சி நடைபெற்று வருகிறது. தேர்தலில் வெற்றிபெற்று ஆட்சியை தக்கவைத்துக்கொள்ள காங்கிரஸ் தீவிர முயற்சி மேற்கொண்டு வருகிறது. அதேவேளை, பஞ்சாபில் ஆட்சியை கைப்பற்ற வேண்டும் என்ற நோக்கத்தோடு பாஜக, ஆம் ஆத்மி உள்ளிட்ட கட்சிகள் களத்தில் இறங்கியுள்ளன.

இதற்கிடையில், பஞ்சாப் மாநிலம் பாடியாலாவில் ஆம் ஆத்மி கட்சி தலைவரும் டெல்லி முதல்-மந்திரியுமான அரவிந்த் கெஜ்ரிவால் தலைமையில் இன்று ‘அமைதி பேரணி’ நடைபெற்றது.

கடந்த சில நாட்களுக்கு முன்னர் பொற்கோவிலில் அத்துமீறி நுழைந்த நபர் அடித்துக்கொலை, சீக்கிய கொடியை அவமதித்த நபர் அடித்துக்கொலை, லூதியானா கீழமை கோர்ட்டில் நடைபெற்ற குண்டுவெடிப்பு தாக்குதலில் வெடிகுண்டை வைத்த நபரே உயிரிழந்தார். இந்த அடுத்தடுத்த சம்பவங்களால் பஞ்சாபில் தொடர்ந்து அசாதாரண சூழ்நிலை நிலவி வருகிறது.

இந்த நிலையில், பஞ்சாபில் அமைதியை நிலைநாட்டும் வகையில் ‘அமைதி பேரணி’ நடத்தப்படுவதாக ஆம் ஆத்மி கட்சி தரப்பில் தெரிவிக்கப்பட்டுள்ளது.

இந்நிலையில், இந்த அமைதி பேரணியின் போது பேசிய ஆம் ஆத்மி கட்சி தலைவர் அரவிந்த் கெஜ்ரிவால் பஞ்சாப் மாநிலம் மோசமடைய காங்கிரஸ் தான் காரணம் என குற்றஞ்சாட்டியுள்ளார். 

இது தொடர்பாக கெஜ்ரிவால் கூறுகையில், பஞ்சாபில் நிலைமை மீண்டும் மோசமடைந்து வருகிறது. காங்கிரஸ் கட்சியும் அதன் தலைவர்களும் பஞ்சாபை அழித்துவிடுவார்கள். நான் இது போன்ற வலுவற்ற அரசை பார்த்ததே இல்லை. அவர்கள் (காங்கிரஸ்) மக்கள் மீது அக்கரை செலுத்துவது இல்லை. அதற்கு மாறாக அவர்கள் அவர்களுக்குள்ளேயே சண்டையிட்டுக்கொள்கின்றனர். பஞ்சாப் மாநிலத்தை ஆம் ஆத்மி கட்சியால் மட்டுமே காப்பாற்ற முடியும்’ என்றார்.