யூடியூப் பார்த்து ஏ.டி.எம். மையத்தில் கொள்ளையடிக்க முயற்சி...!!

புதுடெல்லி, 

டெல்லியின் மேற்கு பகுதியில் உள்ள நங்லோய் என்ற இடத்தில் தனியார் வங்கியின் ஏ.எடி.எம். மையம் ஒன்று உள்ளது. நள்ளிரவில் இந்த ஏ.டி.எம். மையத்துக்குள் புகுந்த 3 பேர் கும்பல் கொண்ட எ.டி.எம். எந்திரத்தை பெயர்த்து எடுக்க முயன்றனர். 

அப்போது அந்த தனியார் வங்கியின் தலைமையகத்தில் எச்சரிக்கை ஒலி எழுப்பப்பட்டது. இது குறித்து வங்கி அதிகாரிகள் உடனடியாக போலீசுக்கு தகவல் தெரிவித்தனர். அதன்பேரில் போலீசார் உடனடியாக அங்கு விரைந்தனர். போலீசாரை பார்த்ததும் கொள்ளை கும்பலை சேர்ந்த 3 பேரும் ஆளுக்கொரு திசையில் ஓட்டம் பிடித்தனர். எனினும் போலீசார் அவர்களை விரட்டிப்பிடித்து கைது செய்தனர்.

அவர்களிடம் விசாரணை நடத்தியதில் 3 பேரும் பீகாரை சேர்ந்தவர்கள் என்பதும், அவர்களில் ஒருவன் 18 வயது நிரம்பாத சிறுவன் என்பதும் தெரியவந்தது. பின்னர் அவர்கள் போலீசாரிடம், தாங்கள் 3 பேரும் டெல்லியில் ஒரே அறையில் தங்கியிருந்து வேலைக்கு சென்று வந்ததாகவும், யூடியூப் வீடியோ மூலம் ஈர்க்கப்பட்டு ஏ.டி.எம். மையத்தில் கொள்ளையடிக்க திட்டமிட்டதாகவும் தெரிவித்தனர். இதையடுத்து போலீசார் அவர்கள் 3 பேரும் மீதும் வழக்குப்பதிவு செய்து தொடர்ந்து விசாரித்து வருகின்றனர்.